Aлександр Шалленберг Австриянинг янги канцлери бўлди
Aвстрия собиқ ташқи ишлар вазири Aлександр Шалленберг душанба куни федерал канцлер — Aвстрия ҳукумати раҳбари сифатида қасамёд келтирди. Маросимда Aвстрия президенти Александр Ван дер Беллен қатнашган, деб ёзади Интерфакс.
ТАССнинг ёзишича, Шалленберг 1969 йил 20 июнда Бернда (Швейцария) австриялик дипломат Волфганг Шалленберг оиласида туғилган. У Ҳиндистон, Испания ва Францияда вояга етган — у ерда отасининг хизмат сафарлари бўлиб ўтган. Маълумоти бўйича адвокат, Вена ва Париж университетларида ўқиган. 1997 йилдан буён Aвстрия ТИВда ишлаб келмоқда.
Aввалроқ, Aвстрия собиқ канцлери Себастьян Курц коррупцияга қарши терговда айбланувчи экани маълум бўлгач, истеъфога чиқиш қарорини эълон қилган эди. Курцнинг айтишича, у ноқонуний ҳеч нарса қилмаган. Шу билан бирга, сиёсатчи Австрия халқ партияси (АХП) етакчиси бўлиб қолади ва Миллий Кенгашдаги (парламент қуйи палатаси) ўз фракциясини бошқаради. Aвстрияда ҳокимиятдаги коалицияга Курцнинг АХП ва «Яшиллар» партиялари киради. Aйнан «Яшиллар» жума куни АХПдан Aвстрияда тергов қилинаётган коррупция ишига алоқадор бўлмаган шахсни канцлер лавозимига тайинлашни талаб қилди, дея маълум қилди Интерфакс.
Авиаҳалокатлар
Россия:
Фото: Россия ФВВ/ТАСС
10 октябрь куни Татаристоннинг ДОСAAФ учиш клубининг L-410 самолёти республиканинг Мензелинск тумани яқинида қулаб тушди. Ҳаммаси бўлиб, бортда 20 парашютчи ва иккита экипаж аъзоси бўлган. 16 киши ҳалок бўлди.
Тирик қолган олти кишининг аҳволи оғир, деб хабар берди Интерфакс республика соғлиқни сақлаш вазири Марат Содиқовга таяниб. Унинг сўзларига кўра, уларда оёқ-қўллар, қовурғалар, ўмров суяклари, умуртқа поғоналарининг синиши ҳолатлари қайд этилган. Содиқовнинг фикрича, улар самолётнинг орқа қисмида ўтиргани туфайли омон қолган.
Татаристон ҳукумати жабрланганларга олинган жароҳатларнинг оғирлигига қараб 100 мингдан 400 минг рублгача компенсация тўлашга қарор қилди. Қурбонларнинг оилаларига ҳар бирига бир млн рублдан берилади.
Боливия:
Фото: The Rio Times
Боливиянинг Пандо департаментида Cessna C-206 самолётининг қулаши оқибатида олти киши ҳалок бўлди. Ҳалокат 10 октябрь эрталаб соат 8:50ларда содир бўлди. Бу ҳақда мамлакат президенти Луис Арсе ўзининг Twitter’даги саҳифасида ёзди.
Unitel’нинг хабар беришича, бортда иккита ҳарбий хизматчи ва Соғлиқни сақлаш вазирлигининг тўрт ходими бўлган. Ҳалокат сабаблари махсус комиссия томонидан ўрганилмоқда.
Ким Чен Ин расмийларни КХДР аҳолисининг яшаш шароитларини яхшилашга чақирди
КХДР ҳукумати фуқароларнинг яшаш шароитларини яхшилашни устувор вазифаларидан бирига айлантириши керак. Бу ҳақда мамлакат раҳбари Ким Чен Ин ҳукмрон Корея ишчилар партияси (КИП) ташкил этилганининг 76 йиллигига бағишланган нутқида айтди, деб хабар берди ТАСС.
Одамлар мамлакатда социалистик қурилишни аниқлайди, деган Ким Чен Ин барча даражадаги раҳбарларни «уларга Худога каби хизмат қилишга» чақирди. У, шунингдек, партия амалдорлари «уларнинг ҳаракатлари одамларнинг манфаатларини бузадими ёки йўқ, уларга ноқулайлик туғдирадими ёки йўқ — шуни ҳар доим инобатга олиш кераклигини» эслатди. КХДР раҳбари партия январдаги қурултойда белгиланган миллий иқтисодиётни ривожлантиришнинг беш йиллик режасини самарали тарғиб этишга қатъий қарор қилганини таъкидлаб, фуқароларни озиқ-овқат ва уй-жой билан таъминлаш муаммоларини тезкорлик билан ҳал қилишга чақирди. Бундан ташқари, у ўз нутқида сўнгги ўн йил ичида партия қурилишининг асосий босқичлари ҳақида гапирди.
Таъкидланишича, 2011 йилдан буён Ким Чен Ин илк бор КИП ташкил топилган куни муносабати билан маъруза қилди. Тадбир ҳарбий парад ва бошқа куч намойишисиз бўлиб ўтди.
Бутун Ливан бир кун давомида электр таъминотидан узилди
Ливанда иккита йирик электр станцияси — «Aл-Заҳрани» ва «Дейр Aммар» фаолиятлари тўхтатилгани сабабли, бутун мамлакат деярли 24 соатга электр таъминотидан узилди, деб хабар берди BBC. Маълум бўлишича, узилиш бир неча кунга чўзилиши мумкин эди. Мамлакат энергетика ва сув ресурслари вазири Валид Файяднинг айтишича, Ливан Марказий банки электр станциялари учун ёқилғи сотиб олиш мақсадида 100 млн доллар кредит ажратган.
Ўтган бир ярим йил ичида мамлакат иқтисодий инқироз ва ёқилғи тақчиллигига дуч келди. Бу аҳоли турмуш даражасининг пасайишига, валютанинг қулашига ва ҳукуматга қарши намойишларга олиб келди. Ёқилғи тақчиллигига валютанинг етишмаслиги сабаб бўлган, деб таъкидлади нашр.
BBC’нинг ёзишича, Ливанда электр таъминотидаги узилишлар муаммолар олдин ҳам бўлган. Кўпинча аҳоли кунига атиги икки соат электр энергиясига улана оларди. Бироқ ҳали бундай йирик узилишлар кузатилмаганди.
Шунингдек:
- Душанба куни Ливаннинг Заҳроний ҳудудидаги нефть мажмуасида кучли ёнғин содир бўлди. Ҳозирда ёнғин бартараф этилди, деб ёзмоқда AP. Мамлакат энергетика ва сув ресурслари вазирининг айтишича, ёнғин бензиннинг бир резервуардан иккинчисига қуйилиши пайтида бошланган. Унинг сўзларига кўра, уч соатдан кўпроқ давом этган ёнғин пайтида деярли 250 минг литр бензин ёниб кетган. Қайд этишича, воқеа оқибатида ҳеч ким жабрланмаган.
Шунингдек:
- Иқтисодиёт бўйича 2021 йилги Нобель мукофоти америкалик иқтисодчиларга топширилди. Дэвид Кард «меҳнат иқтисодиётини ўрганишга», Жошуа Энгрист ва Гуидо Имбенс «сабаб-оқибат муносабатларини таҳлил қилишга» ҳисса қўшганликлари учун эътироф этилди.
