Профессионал боксчилар Шаҳрам Ғиёсов ва Ҳасанбой Дўсматов Белградда (Сербия) бўлиб ўтадиган жаҳон чемпионатида иштирок этадиган Ўзбекистон терма жамоасига қўшилишди. Жаҳон чемпионати 22 октябрдан 7 ноябргача бўлиб ўтади, деб хабар берди Туризм ва спорт вазирлиги.

Шунингдек, терма жамоанинг асосий таркибидан Нодиржон Мирзаҳмедов, Шаҳобиддин Зоиров, Миразизбек Мирзаҳалилов, Абдумалик Халоков, Мужибулло Турсунов, Асадхўжа Мўйдинхўжаев, Саиджамшид Жафаров, Одилжон Аслонов, Шоҳжаҳон Абдуллаев, Мадиёр Саидраҳимов, Лазизбек Муллажонов жой олди. Марат Қурбонов жамоа бош мураббийи бўлди.

Рио Олимпиадасининг кумуш медали совриндори, жаҳон ва Осиё чемпиони Шаҳрам Ғиёсов 2018 йилнинг январь ойида профессионал боксга ўтганини эълон қилган эди. 2016 йилги Олимпия чемпиони Ҳасанбой Дўсматов 2019 йил ноябрь ойида профессионал рингда муваффақиятли дебют қилди.

Бокс бўйича 2019 йилги сўнгги жаҳон чемпионатида ўзбекистонлик боксчилар учта олтин, битта кумуш ва битта бронза медални қўлга киритиб, умумжамоа ҳисобида биринчи ўринни эгаллашганди.