Онлайн кимошди савдосига чиқарилган радар ва камералар ўрнатиш майдончалари сони ўсди, дея хабар қилди Spot нашри E-auksion маълумотларига таянган ҳолда.
Ҳозирда 270 та янги лот мавжуд. Тошкентда 13 та манзил аукционга қўйилди. Энг кўп участка Тошкент (72) ва Бухоро вилоятларида (43), энг ками эса Хоразмда (1) сотувга чиқарилган.
Ҳар бир лот учун охирги икки йил ичидаги транспорт оқими ва аниқланган йўл ҳаракати қоидабузарликлари тўғрисида маълумот берилади. Шу йўл билан ушбу участкадаги қонунбузарлардан тахминий даромадни ҳисоблаш мумкин бўлади.
Бу каби лотларга бўлган талаб юқори. Савдолар вақтида нархлар бир неча ўн баробарга ўсиши мумкин. Масалан, июль ойида Хоразмда бир участка 40 млн сўм ёки бошланғич нархидан 27 баравар қимматроққа сотилди.
Август ойи охирида Тошкент марказидаги радар ўрнатиш жойи электрон аукционда бошланғич баҳосидан 95 баробар қимматга — қарийб 3,5 млрд сўмга сотилгани ҳақида хабар қилган эди.
Сентябрь ўртасида март ойидан буён бюджетга йўл камералари ва радарлари ўрнатиш участкаларини сотишдан қарийб 87 млрд сўм келиб тушгани хабар қилинди.
