РБКнинг маълум қилишича, Ўзбекистон Россиядан 1 миллион гектар ер майдонини қишлоқ хўжалиги маҳсулотларини етиштириш учун ижарага олмоқчи. Улардан олинган ҳосил Ўзбекистоннинг ички бозоридаги талабни қондиришга йўналтирилади.
Октябрь ойи бошида Ўзбекистон қишлоқ хўжалиги вазири Жамшид Хўжаев Россия қишлоқ хўжалиги вазири ўринбосари Сергей Левин билан қишлоқ хўжалиги учун мўлжалланган ерларни ўзбекистонлик фермерларга ижарага беришни муҳокама қилган.
Биринчи босқичда «мулоқот ўрнатиш ва ўзаро ҳамкорлик механизмларни йўлга қўйиш» мақсадида 35 минг гектар ерни ижарага олиш таклиф қилинди. Бунда Россия шароитларида етиштирилиши мумкин бўлган қишлоқ хўжалиги маҳсулотлари: буғдой, соя, мойли экинлар экилиши мумкин. Ҳосил Ўзбекистонга олиб келинади.
Яқин йилларда ижарага олинган ерларнинг умумий майдони 300−500 минг гектаргача, истиқболда эса 1 млн гектаргача кенгайтирилиши мумкин, дея таъкидлади Жамшид Хўжаев.
Бунга жавобан Россия қишлоқ хўжалиги вазири ўринбосари Левин мамлакатнинг 23 та ҳудуди ушбу лойиҳага қизиқиш билдиришганини таъкидлади. Унинг сўзларига кўра, Россия қишлоқ хўжалиги учун фойдаланиши мумкин бўлган 8−13 млн гектарга ерга эга.
Россия томони Ўзбекистонга ўсимлик етиштириш бўйича хорижий инвестицион лойиҳаларни ташкил этиш шароитларини тушунтириб берган. Лойиҳани амалга ошириш муддатлари ва аниқ механизмлар Ўзбекистон ишчи гуруҳининг Россияга ташрифи доирасида муҳокама қилиниши кутилмоқда.
Ўзбекистонда қишлоқ хўжалиги ишларини қийин аҳволга солаётган сув танқислиги муаммоси мавжуд.
Президент Шавкат Мирзиёев ўтган йил 16 декабрь куни ўтказган видеоселекторда вилоят ҳокимларига Россия вилотялари ва шаҳарлари билан ҳудудлараро ҳамкорликни йўлга қўйиш имкониятларини кўриб чиқишни таклиф қилган эди. Ўшанда у ўзбекистонлик тадбиркорлар рублли кредитлардан фойдаланиши ва Ўзбекистонга маҳсулот етказиш учун Россия ҳудудларида ишлаб чиқаришни йўлга қўйиши мумкинлигини айтган эди.
