5 октябрь куни Адлия вазири Ҳаракатлар стратегияси доирасида амалга оширилган ишлар сарҳисобига бағишланган анжуманда келгусидаги устувор вазифаларга ҳам тўхталиб ўтди. Бу ҳақда «Газета.uz» мухбири хабар берди.

«Биринчиси, Ҳукумат ихчам бўлиши керак. Ўзбекистонга жуда катта давлат аппарати тўғри келмайди. Унга кетадиган харажатлар жуда кўп. Ундан кўра иқтисодни ривожлантиришга йўналтиришимиз керак. Қанча давлат органи кўп бўлса, шунча иқтисодиёт юриб кетиши қийин бўлади», — деди у.

Унинг сўзларига кўра, бунинг натижасида «тадбиркорнинг ишлаши қийин бўлади».

«Чунки давлат органи дегани бу — бюрократия дегани. Бу қўшимча ваколат, қўшимча бошқарув функцияси дегани. Шунинг учун бу борада биз ўша ботиб кетган қўлларимизни қайтариб олишимиз керак. Бу бюрократия натижасидаги коррупция, мана шу қўллардаги негатив факторларни йўқотишимиз керак. Буни биринчи даражадаги муаммо сифатида олдимизга қўйишимиз керак», — деди Русланбек Давлетов.

Вазирнинг таъкидлашича, номарказлартириш жараёни жадал давом эттирилиши керак.

«Ҳамма нарса учун Тошкентга келавериш [керак эмас]. Ҳозир оддийгина чегарадан (кириш-чиқишда талаб қилинадиган ҳужжатлар назарда тутилмоқда — таҳр.) ветеринария, СЭС соҳасида айрим хулосаларни олиш учун керак бўлса Тошкентгача келиб кетади. Ўзи келмаса ҳам ҳужжати келади. Бу жуда нотўғри жараён. Шунинг учун буларни мақбуллаштириб, одамларга қулай, енгил тизимни яратишимиз керак», — деди Адлия вазирлиги раҳбари.

Мазкур анжуманда у шунингдек, давлатнинг айрим функцияларини хусусий секторга беришнинг аҳамиятига тўхталиб ўтган эди. «Кўп ҳолатларда хусусий сектор давлатга қараганда яхши ишлайди», — деди Русланбек Давлетов.

Бундан ташқари, вазир жамият очиқлик сиёсати орқали мансабдорларни тарбиялашини таъкидлаганди. «Агар амалдорнинг битта қадами бировга ёқмайдиган қадам бўлса, албатта яширишга ҳаракат қилади, кўп ҳолатларда шунақа», — деди у. Вазирнинг фикрича, очиқлик «қайсидир вазирлик учун қийин бўлиши мумкин, лекин жамият учун яхши».