Спорт гимнастикачиси Оксана Чусовитина 2022 йилда ўтказиладиган Осиё ўйинларида қатнашишини маълум қилди. Бу ҳақда спортчининг ўзи Instagram саҳифасида хабар берди.
«2022 йилги Осиё ўйинларига тайёргарлик кўришга қарор қилганимни барчага етказмоқчиман. Мен, шунчаки, фаолиятимни Ўзбекистон учун медалсиз якунлай олмайман», — дея ёзиб қолдирди 46 ёшли гимнастикачи.
Фото: Оксана Чусовитинанинг Instagram саҳифасидан
Оксана Чусовитина 1975 йил 19 июнь куни Бухоро шаҳрида туғилган. У спорт билан шуғулланишни 8 ёшида бошлаган. Узоқ йиллар давомида Светлана Кузнецова қўл остида спорт гимнастикасини ўрганиб келган. 1990 йил терма жамоа аъзосига айланган.
Оксана Чусовитина спорт гимнастикаси бўйича Олимпия ўйинларида энг кўп иштирок этган спортчи (1992, 1996, 2000, 2004, 2008, 2012, 2016, 2020) ҳисобланади. 1992 йил Барселонада ўтган Олимпия ўйинлари олтин медали соҳиби, 3 карра Жаҳон чемпиони.
Оксана Чусовитина еттита ёзги Олимпия ўйинларида иштирок этган ер юзидаги ягона аёл гимнастикачи сифатида Гиннеснинг рекордлари китобига киритилган. Токиодаги олимпиада унинг учун саккизинчиси эди.
Июль ойида Оксана Чусовитина спортдаги фаолиятини якунлагани ҳақида хабар берилди.
Чусовитина Токиодаги Олимпиададаги иштироки ва келгусидаги режалари ҳақида сўзлаб берган эди. «Финалга чиқа олмадим, лекин бу қўрқинчли нарса эмас. Мен гимнастикада қўлимдан келган барчасини қилдим», — деган эди гимнастикачи.
У «Газета.uz»га берган интервьюсида мураббий бўлмаслигини айтиб ўтган эди. «Мен Ўзбекистонда болалар ва ёшлар спортини ривожлантирмоқчиман, ва шу йўналишда ҳаракат қиламан, айнан соғлом миллатни шакллантириш учун», — деган эди Оксана Чусовитина.
Август ойида Оксана Чусовитина «Ўзбекистон Республикасида хизмат кўрсатган спорт устози» фахрий унвони билан тақдирланди.
