Йирик шаҳарларда, вилоятлар ва туманлар марказларида туну кун фаолият юритувчи савдо ва хизмат кўрсатиш объектлари жойлашган ҳудудларда жамоат хавфсизлигини таъминлаш бўйича қўшимча чора-тадбирлар тўғрисида ҳукумат қарори қабул қилинди.
Ҳужжат туну кун ишлайдиган савдо ва хизмат кўрсатиш объектлари учун жамоат тартибини ҳимоя қилишнинг соддалаштирилган талабларини белгилайди.
Шу билан бирга, Ички ишлар вазирлиги, Фавқулодда вазиятлар вазирлиги ва Миллий гвардияга савдо ва кўнгилочар кўчаларида қўшимча патруллик йўналишлари ва постларини ташкил қилиш, хизматга жалб қилинган отрядлар зичлигини ошириш, шунингдек, тадбиркорлик субъектлари мол-мулкини қўриқлаш, ҳар хил фавқулодда ҳолатларнинг олдини олиш бўйича қўшимча чоралар кўриш вазифаси топширилди.
Бундан ташқари, Миллий Гвардия ва ФВВ йирик шаҳарларда, вилоятлар ва туманлар марказларида ташкил этиладиган савдо ва кўнгилочар кўчалардаги туну кун фаолият юритувчи савдо ва хизмат кўрсатиш объектларида тадбиркорлик субъектлари билан шартнома асосида мол-мулкини қўриқлаш бўйича мунтазам равишда тарғибот-ташвиқот ишларини ташкил этади.
Қарор қабул қилинган кундан уч ой ўтгач кучга киради.
Май ойида йирик шаҳарларда, вилоят ва туман марказларида 1 сентябрга қадар савдо ва кўнгилочар кўчалар яратилиши, тадбиркорлар уларда кун-у тун фаолият олиб боришлари мумкин бўлиши ҳақида хабар берилган эди.
Сентябрь ойи аввалида ҳукумат қарори билан пойтахтдаги истироҳат боғларига туну кун фаолият юритишига рухсат берилди.
