Президент Шавкат Мирзиёев 20 сентябрь куни таълим, маданият ва тиббиёт соҳаларидаги бунёдкорлик лойиҳалари тақдимоти билан танишди. Бу ҳақда президент матбуот хизмати хабар бермоқда.
Давлат раҳбарининг шу йил 23 июндаги қарорига мувофиқ «Янги Ўзбекистон» университетига асос солинган эди. Қарорда университет учун замонавий ўқув кампуси бунёд этилиши белгиланган. Шу мақсадда туркиялик муҳандислар билан биргаликда лойиҳа ишлаб чиқилган.
Тақдимотда ушбу лойиҳанинг асосий жиҳатлари, бўлажак бинода яратиладиган шароитлар ҳақида маълумот берилди.
Шунингдек, янги кутубхона лойиҳаси ҳам кўриб чиқилди. Бу маънавият уйи Алишер Навоий номидаги Ўзбекистон Миллий боғи ҳудудида барпо этилади. «Унинг ташқи кўриниши Ўзбекистондаги қадимий обидаларга уйғун тарзда лойиҳалаштирилган. Улкан китоб фондини сақлаш, мутолаа, маданий ҳордиқ чиқариш, турли тадбирлар ўтказиш билан боғлиқ барча жиҳатлар инобатга олинган», дейилади хабарда.
Шавкат Мирзиёев 14 май куни Республика онкология ва радиология тиббиёт марказига бориб, шароитларни кўздан кечирган эди. Ушбу марказ учун янги бино қуриш вазифаси қўйилиб, Тошкент тиббиёт академияси клиникаси ҳудудидан ер ажратилган. Хорижий тиббиёт муассасаларининг илғор тажрибаси, шифокор ва беморлар учун барча шароитлар ҳисобга олиниб, лойиҳа ишлаб чиқилди, дея қайд этди президент матбуот хизмати.
Янги бино 10 қават бўлиб, биринчи қаватда маслаҳат поликлиникаси ва қабул бўлими жойлашади. Юқори қаватларда 650 стационар ва 100 амбулатор ўринга эга даволаш бўлимлари бўлади. Шунингдек, бу ерда Тошкент тиббиёт академияси, Тошкент врачлар малакасини ошириш институти кафедралари, магистратура, ординатура учун ҳам шароитлар яратилиши кутилмоқда.
Бундан ташқари, бинонинг 3 қаватли ерости қисмида радиология ва нур терапия бўлимлари, замонавий компьютер томография, магнит резонанс томография, рақамли рентген ускуналари ва бошқа замонавий диагностика бўлимлари жойлаштирилади.
Давлат раҳбари қурилишларни халқаро стандартлар асосида, сифатли амалга ошириш, биноларга хизмат кўрсатадиган техник ходимларни ҳозирдан тайёрлаб бориш юзасидан кўрсатмалар берди, дейилади хабарда.
