Тошкент вилояти ҳокими Даврон Ҳидоятов 12 сентябрь куни журналистлар билан бўлиб ўтган очиқ мулоқотда февралда президентга тақдим этилган, бироқ кейинроқ IKEA томонидан рад этилган мебель фабрикасини очиш лойиҳаси ҳақидаги саволларга жавоб берди. Бу ҳақда Kun.uz хабар қилди.
«Тадбиркорларимиз бу масалани таклиф сифатида айтган. Биз ҳам шунақа таклиф бор, деб айтганмиз. Лекин ҳеч қаерда айнан шу лойиҳа бўлади, деган сўз айтилмаган. Масалан, сиз тадбиркорсиз, эртага ёнимга келасиз ва мана бунақа лойиҳам бор, дейсиз. Шундан сўнг, биз у салоҳиятли инвесторми-йўқми, қанча пул тикмоқчи, деб суриштирамиз. Бу масала ҳалигача очиқ, ёпилгани йўқ. Барибир улар бир кунмас бир кун келади. Бу табиий жараён, чунки Европада ишчи кучи қиммат. Бугун бўлмаса эртага келади», — деди Даврон Ҳидоятов.
Унинг таъкидлашича, лойиҳа президентга тақдим этилмасидан аввал IKEA`нинг Туркиядаги ваколатхонаси билан музокаралар олиб борилган ва томонлар дастлабки келишувга эришган.
«Биз ҳеч қачон йўқ нарсани президентга айтмаймиз. Ҳамкорларимиз Швециядаги IKEA (Inter IKEA Systems B.V.) компаниясининг Туркиядаги ваколатхонаси билан музокара олиб бориб, келишувга эришган. Бу ўзидан ўзи бўлмаган», — деди Даврон Ҳидоятов.
Ҳоким ушбу хабар матбуотда шов-шув бўлганидан сўнг компания вакиллари бу нарса жамоатчиликка ошкор бўлиб кетишини кутишмаганини айтишган.
«Ҳар бир компаниянинг ички йўриқномалари бор. Бу масала дастлабки музокаралар натижасидаги келишув бўлган», — дея таъкидлади Даврон Ҳидоятов.
Эслатиб ўтамиз,
8 февраль куни Ўзбекистон президенти Тошкент вилоятларидаги инвестиция лойиҳалари билан танишган ҳақида ёзган эдик. Унда давлат раҳбарига IKEA компанияснининг инновацион мебель ишлаб чиқариш фабрикаси қурилиши лойиҳаси ҳам тақдим этилганди. Лойиҳага кўра, мазкур фабрика 22 ой ичида қурилиши режа қилинган.
Бу бўйича батафсил маълумот олиш мақсадида «Газета.uz» IKEA компаниясининг ОАВ билан ишлаш бўлими билан боғланди. Компания юқоридаги хабар рад этмоқда.
«IKEA Supply`нинг бошқа компаниялари сингари, IKEA Industry Ўзбекистонда фабрика очишни режалаштирмаяпти. Янги бозорларга келсак, IKEA 2025 йилга қадар дунё бўйлаб кўпроқ харидорларни жалб қилишни давом эттириш мақсадида 12 та янги бозорга киришни режалаштирмоқда. Мазкур фаолиятни кенгайтириш режасида Ўзбекистон иштирок этмайди», — дейилади компания хабарида.
Президентга тақдим этилган лойиҳанинг умумий қиймати 52 млн АҚШ доллари миқдорида баҳоланган эди. Шундан 10 млн доллар маблағ лойиҳа ташаббускорининг ўз ҳисобидан, қолган 42 млн доллар эса хорижий инвестиция эвазига молиялаштирилиши айтилган эди.
