14 сентябрь куни Qalampir.uz сайти Сурхондарё вилоятининг Шўрчи туманида 160 тупдан ортиқ тут дарахти қўпорилиб, ўрнида қурилиш бошланганини маълум қилди. Мазкур ҳолат бўйича «Ўзбекипаксаноат» уюшмаси муносабат билдирди.
Маълум қилинишича, 13 сентябрдан 14 сентябрга ўтар кечаси Шўрчи тумани Ободон ҳудуди М41 Бишкек-Душанбе-Термиз халқаро автомобиль йўли ёқасида жойлашган 4 гектарлик тутзордан 160 тупдан ошиқ тут дарахти номаълум шахслар томонидан кесилиб, томири билан қўпориб олинган. Тут дарахтларининг ўрнида 14 сентябрь эрта тонгдан қурилиш ишлари бошланган. Узунлиги 40 метр, энига 18 метр бўлган йирик бинонинг пойдевори қурилишида 8−10 нафар киши ишлаб турган.
Ҳолат юзасидан ишчи гуруҳ томонидан тегишли тартибда далолатнома тузилиб, «Ўзбекипаксаноат» уюшмасига тақдим этилган. Далолатномага кўра, Шўрчи туман Кадастр агентлиги ушбу ҳудуд ҳақиқатан «Ўзбекипаксаноат» уюшмаси тизимидаги «Шўрчи Тайёрлов Агропилла» МЧЖнинг балансида эканлигини тасдиқлагани кўрсатилган.
Маълум бўлишича, ушбу ҳудуд қурилиш ишларини бошлаган «Олтин учбурчак» лойиҳаси раҳбари Дилором Ўроловага Шўрчи тумани ҳокимининг 8 апрелдаги қарори билан автобус бекати ва санитария-гигеник (маиший хизмат кўрсатиш) шаҳобчаси қуриш учун ажратиб берилган.
Қарорда Ободон ҳудудидаги тутзор майдони Шўрчи тумани хокимлиги балансига «Шўрчи Тайёрлов Агропилла» МЧЖнинг 29 мартдаги хатига асосан қайтарилгани кўрсатилган. Аниқланишича, компания томонидан ушбу тутзорнинг Шўрчи тумани хокимлиги балансига қайтарилиши тўғрисида ҳеч қандай хат чиқарилмаган.
Ишчи гуруҳинининг ўрганиш хулосалари асосида Шўрчи тумани прокурорига билдириш хати билан чиқилган ва ҳудудда қурилиш ишлари тўлиқ тўхтатилганлиги айтилди.
Қайд этилишича, «Ўзбекипаксаноат» уюшмаси олинган хулосалар асосида ушбу ноқонуний қилинган ҳатти-ҳаракатлар юзасидан суриштирув олиб бориш ва ушбу жиноятнинг асл сабабчиларини аниқлаш мақсадида 14 сентябрь куни Бош прокуратура ҳамда Экология ва атроф-муҳитни мухофаза қилиш давлат қўмитасига хат киритган.
Август ойининг охирида президент топшириғига билан дарахтларни кесишга мораторий 2024 йилга қадар узайтирилади ва жавобгарлик кескин кучайтирилиши ҳақида хабар берилган эди. Сенятрбь ойи аввалида Шавкат Мирзиёев ўз сайловолди дастурида дарахтларни кесишга муддатсиз мораторий жорий қилиниши ҳақида маълум қилганди.
