14 сентябрь куни Apple компанияси Apple Event онлайн тақдимотини ўтказди. Тақдимотда компания ўзининг янги iPhone 13 смартфонларини, шунингдек, янги iPad планшетлари ва Apple Watch Series 7 соатларини намойиш этди.

iPhone 13 ва 13 mini


iPhone 13 ва 13 mini смартфонларини янги бешта рангда — пушти, кўк, қора, кумуш ва қизил рангларда тақдим этди. Смартфон ташқи кўринишидаги асосий ўзгариш — бу орқа панелдаги иккита камера орасидаги масофа ва олд томонидаги «кокил»нинг 20%га кичрайгани.

Янги iPhone`га энг сўнгги — А15 Bionic процессорлари ўрнатилган. Apple ушбу чипни барча смартфонлар орасидаги энг тез (рақобатчиларникига нисбатан 50%га самаралироқ) процессор деб атамоқда. Шунингдек, ушбу смартфонлар iPhone 12 ва 12 mini`га нисбатан қуввати 2,5 ва 1,5 соат кўпроққа етадиган янги батареяларга эга бўлди. Янги процессорда 5G технологиясини янгилашди, энди смартфон турли мамлакатлардаги катта миқдордаги частоталарда ишлайди.


iPhone 13 смартфони Apple томонидан ишлаб чиқилган янги Super Retina XDR OLED дисплейига эга бўлди. Ушбу дисплей олдинги авлод iPhone`ларига нисбатан 28%га ёрқинроқ эканлиги айтилди. Шунингдек, янада тезроқ ишлайдиган янги графика ишлаб чиқилган ва machine learning тизими яхшиланган.

iPhone 13 ва 13 mini смартфонлари ўтган йилги iPhone 12 Pro Max асосий камераси асосида ишланган янги камера билан жиҳозланган. Янги камера 47%га кўпроқ нурларни ушлай олади, шу сабабга кўра, яхши ёритилмаган жойларда ҳам сифатли тасвирга олиш имкониятига эга.

Янги смартфон камерасининг асосий янгиликларидан бири — видеони суратга олиш учун «кино режими»нинг қўшилгани бўлди. Бу сизга динамик фокусни ҳаракатдаги объектда сақлаган ҳолда кинематографик лавҳаларни яратиш қулайлигини беради.

«Кино режими»да олинган видеолавҳа.

iPhone 13 ва 13 mini 24 сентябрдан бошлаб АҚШ дўконларида сотувга чиқади ва уларни 22 сентябрдан бошлаб олдиндан буюртма қилиш мумкин бўлади. Янги смартфонлар хотирасининг сиғими икки баробарга оширилган, яъни 128, 256 ва 512 ГБ хотирага эга версиялари сотувга чиқарилади. iPhone 13 нинг нархи $799 дан, iPhone 13 mini`нинг нархи $699 дан бошланади.

iPhone 13 Pro ва Pro Max


iPhone 13 катта моделларининг экранлари янгиланиб, 25%га юқори ёрқинлик кучига (1000 нитгача) ва 120 Гц гача динамик янгиланиш частотасига эга дисплей ўрнатилган. iPhone 13 Pro ва Pro Max моделларини ташқи кўриниши деярли ўзгармаган, бироқ ушбу моделларнинг ҳам «кокили» 20%га кичрайтирилган. Ушбу смартфон моделлари тўрт хил рангда — графит, олтин, кумуш ва янги sierra blue рангларида сотувга чиқарилади.

Дисплей ҳажми: 6,1 дюйм (Pro); 6,7 дюйм (Pro Max).

iPhone 13 Pro ва Pro Max смартфонларига асосий моделлардагидан бироз кучлироқ процессорлар ўрнатилган. Яъни iPhone 13 ва 13 mini А15 процессорида тўртта график ядро бўлса, iPhone 13 Pro ва Pro Max`да бешта ядро мавжуд.

iPhone 13 Pro`нинг қуввати аввалги версияларига қараганда 1,5 соат, Pro Max`нинг қуввати эса 2,5 соат кўпроққа етади.

iPhone 13 Pro смартфонининг нархи $999 дан, Pro Max эса $1099 дан бошланади. Шунингдек, фойдаланувчилар 1 терабайт хотирага эга бўлган версияни танлашлари ҳам мумкин бўлади. Смартфонларга олдиндан буюртма 17 сентябрдан бошланади ва АҚШ дўконларида 24 сентябрдан бошлаб сотувга чиқарилади.

iPad ва iPad mini


iPad планшетларининг янги авлоди A13 Bionic чипига, шунингдек, Apple Pencil, Smart Keyboard технологияларига эга бўлди. iPad`нинг 64 Гб хотирали версиясини $329 долларга сотиб олиш мумкин.

iPad планшетлари икки хил версияда — Wi-Fi ва Wi-Fi+Cellular сотувга чиқарилади. Ушбу планшетлар икки хил рангда намойиш этилди — космик кулранг ва кумуш ранг. Дизайнга ўзгартириш киритилмаган. Янгиланган дисплей 10,2 дюйм ҳажмга эга. Минимал ички хотира — 64 ГБ, максимал — 256 ГБ.


iPad mini 8,3 дюймга тенг Liquid Retina дисплейига эга, шунингдек, янги модел экранида «уйга» кнопкаси мавжуд эмас. Планшетлар пушти, сиёҳранг, «кулранг коинот» ва «порлоқ юлдуз» номли рангларда намойиш этилди. iPad mini`га USB Type-C порти ўрнатилган ва 5G технологияси имкониятларига эга. Бундай планшет нархи $499 дан бошланади.


iPad ва iPad mini планшетлари 24 сентябрдан бошлаб 28 та мамлакатда сотувга чиқарилади.

Apple Watch 7


Тақдимотда Apple Watch 7 ақлли соатлари намойиш этилди, аммо сотувга чиқарилиш санаси очиқланмади.

Apple Watch 7`даги асосий ўзгариш бу унинг дизайнида бўлиб, унинг экрани Apple Watch 6`никига нисбатан 40%га каттароқ. Бунинг эвазига унинг экранига 50%га кўпроқ матн сиғади ва соатдаги тугмачалар катталаштирилган.

Шунингдек, компаниянинг таъкидлашича, Apple Watch 7`нинг зарбалар ва тўқнашувларга ҳамда чангга ва сувга бўлган ҳимояси кучайтирилган. Watch Series 7 соатларининг батареялари катталаштирилган ва 33% тезроқ қувват олиш хусусиятига эга. Маълум қилинишича, соатнинг қувватини 45 дақиқа ичида тўлдириш мумкин. Watch Series 7 қувват тўлдирилган батареяси 18 соат ишлайди.

Соатдаги алюминий корпуслар қайта ишланган материаллардан тайёрланади. Apple Watch 7 бешта янги рангларда: оқ, қора, кўк, қизил ва зайтун рангларида намойиш этилди.

Apple Watch 7`нинг нархи $399 доллардан бошланади ва шу йилнинг куз фаслида сотувга чиқарилади.