Давлат статистика қўмитаси маълумотларига кўра, январь-август ойларида Ўзбекистон бўйлаб жами 174 998 та никоҳ ҳолатлари қайд этилган. Бу ўтган йилнинг мос даврига нисбатан 36 288 тага кўп.

Ўтган саккиз ой мобайнида энг кам никоҳ ҳолатлари февраль ойида қайд этилган — 16346 та. Апрель, май ойларида қайд этилган никоҳ ҳолатлари камайиш ва нисбатан секин ўсиш тенденциясини намоён қилганлигини 1 апрелдан республикада карантин чекловларининг кучайтирилганлиги билан изоҳлаш мумкин. 2021 йил 1 апрелдан оммавий тадбирлар ўтказишга айрим чекловлар ўрнатилган эди, хусусан, тўй ва оилавий маросимларни 100 кишидан кўп бўлмаган ҳолда ўтказиш белгиланган эди.

20 июлдан жорий қилинган янги чекловларга қарамай никоҳни қайд этиш ҳолатлари август ойида кескин ошган.


2020

2021

Январь

19116

19703

Февраль

15237

16346

Март

15158

23829

Апрель

893

17236

Май

7166

19722

Июнь

18005

22152

Июль

21419

24491

Август

41716

31519

Сентябрь

45334

-

Октябрь

45036

-

Ноябрь

35827

-

Декабрь

31878

-

2020 йилда республика бўйича никоҳ ҳолатларини қайд этишга доир статистикада ҳам карантин чекловлари таъсиридаги қизиқ тенденцияни кузатиш мумкин. Жумладан, Статистика қўмитаси маълумотларига кўра, 2020 йилда республика бўйича никоҳ ҳолатлари 2019 йилга нисбатан 4,6% га қисқариб, жами 296 785 тани ташкил этган. Бу 2020 йил март ойи охиридан август ойи ўрталаригача республикада амал қилган қатъий карантин чекловлари билан изоҳланади. Мамлакатда жорий қилинган карантин чекловлари, хусусан, тўй маросимларини ўтказиш билан боғлиқ чекловларнинг қайд этилган никоҳ ҳолатлари сонига таъсирини қуйидаги график асосида баҳолаш мумкин.

2020 йил ва 2021 йилнинг дастлабки саккиз ойида никоҳ ҳолатларини қайд этиш динамикаси. Статистика қўмитаси маълумотлари асосида «Газета.uz» томонидан тайёрланган.

Республикада илк коронавирус ҳолати расман тасдиқланганидан сўнг 2020 йил 24 мартидан бошлаб тўй маросимларини ўтказишга таъқиқ қўйилган эди. Натижада 2020 йил апрель ойида республика бўйича атиги 893 та никоҳ ҳолати қайд этилган. Май ойидан қонуний никоҳни қайд этиш ҳолатлари кескин ўсишни бошлаб, июль ойида нисбатан секин ўсган. Буни 2020 йил 10 июлдан мамлакатда карантин чекловлари кучайтирилганлиги билан изоҳлаш мумкин. 2020 йил 15 августдан тўй маросимларини 30 кишидан кўп одам иштирок этмаган ҳолда ташкил этишга рухсат берилган. Ўз навбатида, август, сентябрь, октябрь ойларида никоҳни қайд этиш ҳолатлари ҳам кескин ошиб борган. Шуниси эътиборлики, 2020 йилнинг сўнгги беш ойида — карантин чекловлари юмшатилганидан кейин — дастлабки етти ойдагига қараганда икки баробар кўпроқ никоҳ ҳолатлари қайд этилган.