14 сентябрь куни Хивада «Марказий Осиё дунё цивилизациялари чорраҳасида» халқаро маданият форумига старт берилди, дея хабар бермоқда тадбир матбуот маркази «Газета.uz»га.
Форум ЮНEСКО билан биргаликда президент Шавкат Мирзиёев томонидан БМТ Бош ассамблеясининг 75 -сессиясида билдирилган ташаббуси асосида ўтказилмоқда.
Ушбу маданий форум доирасида ТУРКСОЙга аъзо бўлгандавлатлар маданият вазирлари доимий кенгаши йиғилиши бўлиб ўтиши кутилмоқда. Дастур доирасида «Хива — Турк дунёсининг маданий пойтахти» доирасидаги тадбирлар ҳақида ҳисобот, 2022 йил турк дунёсининг маданий пойтахти тақдимоти, шунингдек, 2021−2024 йиллар учун ТУРКСОЙ бош котиби сайлови бўлиб ўтади.
Бундан ташқари, 13−21 сентябрь кунлари Тошкент, Хива ва Нукус шаҳарларида Маданий мерос ҳафталигининг бир қатор маданий тадбирлари ўтмоқда.
Ҳафталик доирасида Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамиятининг «Ўзбекистон маданий мероси — Янги Ренессанс пойдевори» V Конгресси бўлиб ўтади.
Ўзбекистон ҳукумати қўллаб қувватлаши билан ўтказилаётган V конгресс Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти ва Ўзбекистон электрон оммавий ахборот воситалари миллий ассоциацияси томонидан ташкиллаштирилган, ЮНEСКО, Туризм ва спорт вазирлиги, Маданият вазирлиги, «Eriell Group» нефть сервис компанияси кўмаги билан ўтказилмоқда.
Конгрессда дунёнинг 46 мамлакатидан ташриф буюрган 200 га яқин олим ва мутахассислар — етакчи шарқшунослар, экспертлар, тадқиқотчилар, қўлёзмалар ва миниатюралар бўйича мутахассислар ва бошқа кўплаб мутахассислар иштирок этади.
Маданий мерос ҳафталиги доирасида ўндан ортиқ кўргазмалар ўтказиш режалаштирилган:
- «Камолиддин Беҳзод миниатюралари» фотокўргазмаси;
- археолог, Ўрта Осиё маданияти тадқиқотчиси Леон Семёнович Баршевский фотокўргазмаси;
- риштон кулолчилик буюмлари кўргазмаси;
- Шаҳрисабз ва Самарқанд ёдгорликларига виртуал саёҳат «Замонавий илм-фанда 3D-технологияси» видеоарт кўргазмаси;
- Жамол Усмоновнинг «Алишер Навоий шеърияти» суратлар кўргазмаси;
- Ўзбекистон Миллий банкининг нумизматик тўплами кўргазмаси.
Шунингдек, Маданий мерос ҳафталиги доирасида ўзбек санъатининг жаҳон ва маҳаллий тўпламларда сақланаётган дурдоналарига бағишланган «Ўзбекистон маданий мероси дунё тўпламларида» туркумидаги 50 та ноёб китоб-альбом тақдимоти бўлиб ўтади.
Шунингдек, китоб-альбомларнинг 50 та тўпламини музейлар, галереялар, таълим муассасалари, хорижий мамлакатларнинг Ўзбекистондаги элчихоналари ва консулликларига топшириш маросимини ўтказиш режалаштирилган.
«Мерос ҳафталиги» иштирокчилари Нукус шаҳрига ташриф буюришади ва Нукус бахши мактабида «Бахши санъатининг жаҳон маданияти цивилизациясида тутган ўрни» халқаро илмий -назарий конференциясининг очилиш маросимида, сўнг эса Халқаро бахши санъати фестивалида иштирок этишади.
Шунингдек, Нукусда ЮНEСКО шафелигида «Археология ва туризм: салоҳият ва меросни бошқаришни аниқлаш» халқаро конференцияси бўлиб ўтади. Иштирокчилар археологик меросни бошқариш ва геокултурал брендинг, фундаментал ва амалий фандаги археологик мерос ва бошқа долзарб масалаларни муҳокама қиладилар.
