Ижтимоий тармоқларда ИИО ходимлари ва фуқаролар ўртасидаги зиддиятли вазият акс этган видеолавҳалар тарқалди. Мазкур ҳолат юзасидан пойтахт ИИББ изоҳ берди.
Маълум қилинишича, 12 сентябрь куни тахминан соат 12:20 ларда Чилонзор туманидаги Бунёдкор ва КХАЙ кўчалари кесишмасида ЙПХ инспекторлари Cobalt автомобиль ҳайдовчиси 35 ёшли Б. У. ни йўл ҳаракати қоидаларини бузганлиги учун тўхтатган.
Қайд этилишича, маъмурий ҳуқуқбузарлик содир этган шахсга баённома расмийлаштириш жараёнида йўл четида тўхтаб турган автомобиль ҳайдовчиси 29 ёшли Т. Р. аралашган. У ходимларнинг қонуний фаолиятига тўсқинлик қилиб, жанжал кўтарган. Шунингдек, ички ишлар органи ходимига фаол қаршилик кўрсатиб, тан жароҳати етказган.
«Ҳуқуқбузарнинг ноқонуний ҳаракатларига чек қўйиш мақсадида яқин орада хизмат олиб бораётган ППХ ходимлари етиб келишган. ИИО ходимлари Т. Р. ни яқин орадаги ИИБга олиб кетиш учун транспорт воситасига утқизиш жараёнида акс этган видео ижтимоий тармоқларда тарқалган», — дея қўшимча қилинади хабарда.
Таъкидланишича, жанжал иштирокчилари Чилонзор тумани ИИО ФМБга олиб борилган. Мазкур ҳолат юзасидан терговга қадар текширув олиб борилмоқда.
«Текширув якуни бўйича ички ишлар органлари ходимларининг қонуний фаолиятига қаршилик кўрсатган барча фуқароларнинг шахси аниқланиб, уларнинг қилмишига ҳуқуқий баҳо берилади ва уларга нисбатан қонуний чора кўрилади», — дейилади хабарда.
