АҚШ Махфий хизмати ўзининг Twitter`даги саҳифасида 2001 йил 11 сентябрдаги фожианинг аввал эълон қилинмаган суратларини намойиш этди.
Бугун АҚШда Ал-Қоида террористик гуруҳи томонидан содир этган терактларга 20 йил тўлди. Ўша куни эрта тонгда жами 19 террорчидан иборат 4 та гуруҳ йўловчи авиалайнерларни қўлга олган эди.
Ҳар бир гуруҳ камида бошланғич учиш кўникмаларига эга бир нафардан аъзога эга бўлган. Улар Нью-Йоркдаги Манхеттеннинг жанубида жойланган Жаҳон савдо маркази минораларига қарата иккита самолётни йўналтирган. American Airlines рейси Жаҳон савдо марказининг биринчи (шимолдаги) биносига, United Airlines рейси эса ЖСМнинг иккинчи биноси (жанубдаги) биносига бориб урилади. Бунинг оқибатида икки бино ҳам қулаб, ён атрофдаги биноларга жиддий зарар етказади.
Учинчи самолёт (American Airlines рейси) эса Вашингтондан узоқ бўлмаган Пентагон биносига йўналтирилган. Тўртинчи ҳаво лайнерининг (93 United Airlines рейси) экипажи ва йўловчилари террорчилардан самолёт бошқарувини олиб қўйишга ҳаракат қилишган, натижада самолёт Пенсильваниядаги майдонда қулаган.
11 сентябрь фожиаси оқибатида террорчилардан ташқари 2977 киши ҳалок бўлган.
АҚШ Махфий хизмати собиқ директори Браян Стаффорд ва унинг раҳбарлигидаги Инқироз маркази бошқарув аъзолари. 2001 йил 11 сентябрь.
Махфий хизмат директори ёрдамчисининг ўринбосари Фрэнк Ларкин (чапда) президент Жорж Бушни воқеа марказига кузатиб бормоқда, 2001 йил 14 сентябрь. Оқ уй томонидан олинган суратни Фрэнк Ларкиннинг отаси тақдим этган.
Махфий хизмат ходими томонидан совға қилинган фотосуратларда эса эпицентр яқинидаги ҳудудни қайта тиклаш ишлари қандай кетаётганини кўриш мумкин.
Ушбу суратлар олдин ҳеч қаерда эълон қилинмаган. Унда Махфий хизматнинг Нью-Йоркдаги офиси автотураргоҳида зирхланган лимузинларнинг теракт оқибатида зарар етган ҳолатини кўришингиз мумкин.
Фожиа содир бўлгандан кейинги сурат.
Аввалроқ, AҚШ Aдлия вазирлиги ҳукумат томонидан махфийлаштирилган 2001 йил 11 сентябрь воқеалари билан боғлиқ ҳужжатларни қайта кўриб чиқади. Бу ҳақда мамлакат президенти Жо Байден айтиб ўтди. Байденнинг сўзларига кўра, унинг маъмурияти «қонун доирасида максимал даражада ошкоралик"ка содиқдир. Бу борада, АҚШ раҳбари Aдлия вазирлигининг махфийлаштирилган ҳужжатларни қайта кўриб чиқиш бўича қарорини олқишлаётганини таъкидлади.
Унга қадар, 1,8 мингга яқин америкаликлар, шу жумладан 11 сентябрь воқеаларида қурбон бўлганларнинг қариндошлари Байденга мактуб йўллаб, воқеанинг сири ошкор қилмагунча, президентни фожианинг 20 йиллигига бағишланган тадбирларда қатнашмасликка чақиришди. Мурожаат муаллифлари бу ҳужжатларда Саудия Aрабистони раҳбарларининг воқеага алоқадорлигини исботловчи далиллар борлигига ишонишмоқда. Бундан ташқари, америкаликлар Байден президентликка номзод бўлганида, бу борада иложи борича кўпроқ маълумотларни ошкор қилишга ваъда берганига эътибор қаратишди.
