Халқаро ҳамжамият Афғонистонда ҳокимиятни қўлга олган радикал «Толибон» ҳаракати билан мулоқотни давом эттириши керак, дейди БМТ бош котиби Антониу Гутерриш Agence France-Presse`га берган интервьюсида. Бу ҳақда ТАСС хабар бермоқда.

«Тўғридан -тўғри принципларимизни тасдиқлаб, „Толибон“ билан мулоқот қилиш керак. Бундай мулоқотни афғон халқи билан бирдамлик учун ўтказиш керак», — деди у. «Бизнинг бурчимиз — кўп азоб чекаётган одамлар билан бирдамлагимизни кўрсатишдир, миллионлаб одамлар очликдан ўлиши мумкин», — деди Гутерриш.

«Вазиятни олдиндан айтиб бўлмайди ва шунинг учун агар биз Афғонистон терроризм маркази бўлмаслигини истасак, агар аёллар ўтган даврда қўлга киритган ҳуқуқларини йўқотмаслигини истасак, турли этник гуруҳлар ўз манфаатлари инобатга олинаётганини ҳис қилишлари учун «Толибон»ни [мунозарага] жалб қилиш керак», — дея қайд этди БМТ Бош котиби. «Биз ҳеч бўлмаганда муҳокамага тайёрлигини кўраяпмиз», — дея қўшимча қилди у. Гутерриш шартлар бажарилган тақдирда Афғонистонга ташриф буюриши мумкинлигини маълум қилди.

Унинг сўзларига кўра, БМТ Афғонистонда афғон жамиятининг барча вакиллари иштирок этиши керак бўлган «инклюзив ҳукумат» тузилишини қўллаб-қувватлайди. «Ва ушбу биринчи вақтинчалик ҳукумат бундай таассурот қолдираётгани йўқ», — дейди Гутерриш.

Гутерриш «инсон ҳуқуқлари ҳурмат қилиниши, терроризмнинг Афғонистонда базаси бўлмаслиги ва толиблар гиёҳвандликка қарши курашда ҳамкорлик қилиши» кераклигини таъкидлади. «Биз мамлакат тинчлик ва барқарорлик шароитида, одамлар ҳуқуқлари ҳурмат қилиниб бошқарилишини истаймиз», — деди БМТ бош котиби. Унинг сўзларига кўра, толиблар «тан олинишини, санкциялар бекор қилинишини, молиявий қўллаб -қувватлашни хоҳлайди ва бу маълум даражада таъсир қилиш омилларини беради».