Вирусология илмий-тадқиқот институти директори Эркин Мусабоев ZF-UZ-VAC 2001 вакцинасининг Ўзбекистондаги клиник синовлари учинчи босқичининг дастлабки натижаларини эълон қилди.
Профессор 7 сентябрь куни Инновацион ривожланиш вазирлигида ўтказилган «СОVID-19. Вакцинация — эришилган ютуқлар, истиқболлар ва мақсадлар» мавзусидаги илмий-амалий конференцияда чиқиш қилди. Маълумотлар 1 июль ҳолатига кўрсатилган.
5520 нафар кўнгиллилар учта доза билан тўлиқ эмланган, улардан 209 нафари 60 ёшдан катта. Клиник синовлар қоидасига биноан кўнгиллиларнинг ярми вакцина олишган (2757 киши ёки 49,95%, улардан 102 нафари 60 ёшдан катта), қолганлар эса (2763 киши ёки 50,05%, улардан 107 нафари 60 ёшдан катта) плацебо, ҳеч қандай даволовчи хусусиятларга эга бўлмаган модда, олишган.
6 ой давомида барча учта доза билан эмлангандан сўнг COVID-19 билан касалланганлар сони вакцина олганлар орасида 20 кишини (0,73%) ва плацебо олганлар орасида 73 кишини (2,64%) ташкил қилган. Вакцина олганлар орасида 60 ёшдан катталар касалланмаган бўлса, плацебо олганлардан фақат битта катта ёшдаги киши коронавирус билан оғриган. Вакцина олган 4 кишида (0,15%) ва плацебо олган 15 кишида (0,54%) касалликнинг ўрта оғир ҳолати кузатилган бўлса, оғир ва ўта оғир ҳолат фақатгина плацебо олган бир кишида кузатилган (0,04%).
На вакцина олганлар, на плацебо олганлар орасида ўлим ҳолатлари қайд этилмаган.
Шу билан бирга, иккала гуруҳда ҳам айрим «ножўя ҳолатлар» кузатилган. Эркин Мусабоев булар нимани англатишига аниқлик киритмади. Вакцина олганлар орасида 8 кишида (0,29%) ва плацебо олганлар орасида 5 кишида (0,18%) «ножўя ҳолатлар» кузатилган.
«Ҳозирда [Ўзбекистонда] қўлланилаётган барча вакциналардан энг юмшоғи, ножўя таъсирлари энг кам учраётгани хитой-ўзбек вакцинаси деб айтиш мумкин», — деди Эркин Мусабоев.
Эслатиб ўтамиз, август ойининг охирида ZF-2001 вакцинасининг Хуань провинцияси (Хитой) ҳамда Ўзбекистон, Индонезия, Покистон ва Эквадорда клиник синовлари учинчи босқичи натижалари эълон қилинган эди. Вакцинанинг учинчи дозасидан кейинги самарадорлиги барча штаммларга қарши 81,76%ни, «британча» штаммга қарши 92,93%ни ва «дельта» штаммга қарши 77,54%ни ташкил қилди. Шунингдек, ZF-UZ-VAC2001 вакцинаси билан эмланганлар орасида касалликнинг оғир шакли билан оғриганлар ёки ўлим ҳолатлари қайд этилмаган.
