6 сентябрь, янги ўқув йилининг биринчи кунида Тошкент кўчаларида пайдо бўлган узун тирбандликлар орасида жамоат транспорти ҳам қолиб кетди.
Пойтахт Транспорт бошқармаси ўз изоҳида тирбандликларга шаҳарда енгил автомобиль ва йўналишсиз таксилар сони ортиб кетганини сабаб қилиб кўрсатди. «Бу эса ўз навбатида автобус ва йўналишли таксилар оралиқ вақтининг ошишига олиб келди», — дейилади бошқарма хабарида.
Бошқарма «ўқув мавсумининг биринчи кунида йўналишсиз такси хизматларига бўлган катта талабдан айрим ҳайдовчилар кўпроқ фойда оламан деб сунъий равишда йўналишсиз такси хизматлари нархини кескин ошириб юборган ва аҳолининг ҳақли эътирозларига сабаб бўлган"ини тасдиқлади.
Хабарда шаҳарликларга такси чақириш учун мобил иловадан фойдаланиш тавсия қилинди — «бунда вақтингизни ва пулингизни тежайсиз». «Шу билан бирга, жамоат транспортида ҳаркатланишни режалаштириш ва кузатиш учун мўлжалланган мобил иловалар орқали керакли транспорт йўналишларини онлайн тарзда кузатиш имкони яратилган. Ушбу иловадан фойдаланиб керакли йўналишнинг келиш вақтини билиб, йўлингизни режалаштириш орқали ўз вақтингизни тежашингиз мумкин».
Транспорт бошқармаси барча автобус саройларида жамоат транспорти йўловчилар оқимининг кўпайишига олдиндан тайёргарлик кўрилгани, ҳаракатланувчи таркиб санитар ва техник кўрикдан ўтказилди ҳамда дезинфекция ишлари олиб борилганини маълум қилди.
Кечаги тиғиз вақтда 1397 та ҳаракат таркиби, шу жумладан 850 та автобус ва 547 та микроавтобус хизмат кўрсатган.
Бундан ташқари соат 7:30 дан 9:00 гача метрополитеннинг Чилонзор метро йўналишида 3 дақиқа, Ўзбекистон йўналишида 4 дақиқа ва Юнусобод йўналишларида 7 дақиқалик оралиқ масофа билан метро поездлари ҳаракатланган.
