Америка Қўшма Штатлари ўз қўшинларини Афғонистондан олиб чиқди ва мамлакатдаги бутун ҳарбий миссиясини якунлади. Бу ҳақда душанба куни Пентагонда ўтказилган матбуот брифингида АҚШ Қуролли Кучлари Марказий қўмондонлиги бошлиғи генерал Кеннет Маккензи маълум қилди, дея хабар бермоқда ТАСС.
«Мен бугун бу ерга қўшинларимизни Афғонистондан олиб чиқиш ва Америка ҳамда бошқа давлатлар фуқароларини, шунингдек, заиф аҳволда қолган афғонларни эвакуация қилиш бўйича ҳарбий операция тугаганини эълон қилиш учун келдим», — деди у.
«Сўнгги [ҳарбий транспорт самолёти] C-17 30 август куни тушдан кейин Ҳамид Карзай номидаги халқаро аэропортдан АҚШ шарқий қирғоғи вақти билан 15:29 да жўнади ва бошқариладиган оҳирги самолёт айни пайтда Афғонистон ҳаво майдонини тарк этди», — дея қўшимча қилди генерал. Маккензининг айтишича, Кобулдан кетган охирги самолётда АҚШнинг Афғонистондаги муваққат ишлар вакили Росс Уилсон бўлган.
Маккензининг сўзларига кўра, бу «Афғонистонда 2001 йил 11 сентябрдан кўп ўтмай бошланган 20 йилга яқин миссиянинг тугаши» деган маънони англатади.
«Бунинг эвазига 2461 нафар АҚШ ҳарбийлари ва фуқаролари қурбон бўлган, 20 мингдан ортиғи яраланган. Афсуски ушбу рақамлар ичига ўтган ҳафта яна „Ҳуросондаги ислом давлати“ гуруҳининг худкуши томонидан ўлдирилган 13 нафар АҚШ ҳарбийлари ҳам кирди», — деди Кеннет Маккензи.
«Бу операциянинг ҳарбий босқичи тугади, энди унинг дипломатик давоми бошланади. Бизнинг Давлат департаментимиз қолган [Афғонистондаги] Америка фуқароларига [мамлакатни тарк этишига] ёрдам бериш учун барча саъй -ҳаракатларни амалга оширади», — таъкидлади у. Қўмондонлик бошлиғининг сўзларига кўра, Афғонистонда қолган америкаликлар сони «бир неча юз» кишини ташкил қилмоқда.
Унинг қўшимча қилишича, АҚШ Америка армиясига ёрдам берган афғонларни мамлакатдан олиб чиқиш учун «жуда агрессив ва қаттиқ музокаралар олиб боради». Хусусан, гап таржимонлар ҳақида кетмоқда. «Ҳарбий босқич тугади, лекин бизнинг бу одамларни қайтариш истагимиз аввалгидек кучли. <...> Энди Давлат департаменти бу масалада етакчи роль ўйнайди», — дейди генерал.
Шунингдек, Америка дипломатлари ҳам Афғонистонни тарк этди, мамлакатнинг Қобулдаги элчихонаси ёпиқлигича қолади, дея маълум қилди давлат котиби Энтони Ж. Блинкен.
«Бугунги кундан бошлаб биз Кобулдаги дипломатик иштирокимизни тўхтатдик ва ўз дипломатик фаолиятимизни Доҳага, Қатарга кўчирдик», — деди у. «Хавфсизлик соҳасидаги беқарорлик ва Афғонистондаги сиёсий вазиятнинг ноаниқлигини ҳисобга олсак, бу оқилона қадам бўлди», — деди Блинкен.
Давлат департаменти раҳбарининг сўзларига кўра, Доҳа «айни пайтда» Афғонистон билан «дипломатик иш олиб боради», консуллик фаолиятини амалга оширади, гуманитар ёрдам кўрсатиш масалаларини ҳал қилади, шунингдек Вашингтоннинг Афғонистондаги иттифоқчилари ва шериклари билан мувофиқлаштириш ишлари олиб борилади.
