Президент Шавкат Мирзиёев 31 августдаги қарори билан цемент ишлаб чиқарувчилар учун фойда солиғининг ставкасини пасайтиришни маъқуллади.

Хусусан, 2021 йил 1 октябрдан бошлаб цемент (клинкер) ишлаб чиқарувчилар учун фойда солиғининг ставкасини 20 фоиздан 15 фоизгача пасайтириш кўзда тутилмоқда.

2022 йил 1 январдан бошлаб цемент ишлаб чиқаришга мўлжалланган 1 тонна оҳактош учун ер қаъридан фойдаланганлик учун солиқ ставкасини икки баравар камайтирган ҳолда 22 500 сўм миқдорда белгиланади.

20 август куни президент ва тадбиркорлар ўртасида ўтказилган очиқ мулоқот чоғида Karakalpak sement директори Шавкат Азизов Шавкат Мирзиёевдан цемент ишлаб чиқарувчилар учун фойда солиғи ставкасини 15 фоизгача туширишни сўраган эди, чунки маҳаллий корхоналар импорт маҳсулотлари билан рақобатлаша олмайди. Давлат раҳбари цемент маҳсулотларининг нархларини таҳлил қилиш ва унга «илмий асосланган таҳлил» тақдим қилиб, солиқ ставкасини пасайтириш имкониятларини кўриб чиқишни топширганди.

Тадбиркор жорий йилнинг олти ойида маҳаллий ишлаб чиқарувчилар цементининг ўртача бир тонна нархи 588 минг сўмни ташкил этган, импорт қилинганида эса маҳсулот таннархи 12−13% арзонроқ — 521 минг сўмга баҳоланган.

Эслатиб ўтамиз, Ўзбекистон январь-апрель ойларида цемент импорти ҳажмини икки баробарга оширган эди. Бунга цемент маҳсулотларини олиб кириш учун божхона божини бекор қилигани (бунгача 30 фоизни ташкил этган) ва қурилиш ҳажмининг ошгани сабабли бўлган. Шунда, тўрт ой ичида 50,5 млн долларлик 1 млн тонна цемент олиб кирилди.