Шу кунларда Mahalla телеканалида эфирга узатилаётган «Саодат» сериалидан бир кадр ижтимоий тармоқларда тарқалди. Суратда Ўзбекистоннинг биринчи президенти Ислом Каримовнинг портрети хиралаштирилгани акс этган.
«Газета.uz» мазкур вазиятга ойдинлик киритиш мақсадида телеканал раҳбариятига мурожаат қилди. Mahalla телеканали директори ўринбосари Азиз Нуруллаев суратнинг хира эканлигини «техник хатолик» дея изоҳлади.
«„Саодат“ сериали бўлган. У ерда техник хатолик кетган. Ҳозир бу нарса йўқ. Улар эскисидан [архивдан] олишган… Биз суриштирдик шу кунларда эфирга берилаётган сериалда бу кетмаяпти, олиб ташланган дейишди… Шу кеча-кундузда кўришинглар мумкин Саодат сериали (эфирга) кетаяпти. Унақа ҳеч нарса беркитилмаган… Монтажда энди ҳар хил нарса бўлиб туради», — деди у.
2020 йилнинг сентябрида «Газета.uz» Sevimli TV телеканали турк сериали намойиши вақтида калта кўйлакда бўлган қизларнинг оёқларини хиралаштиргани ҳақида ёзган эди. Ўшанда телеканал маъмурияти бу «қонунчилик ва миллий қадриятларга асосланган» ҳамда томошабинлар фикрини инобатга олган ҳолда қилинганини айтганди.
Ўзбекистон миллий телерадиокомпаниясининг Mahalla рақамли маърифий телерадиоканали 2015 йилнинг январ ойида эфирга чиқа бошлади. Канал аҳолини демократик давлат ва фуқаролик жамиятини шакллантиришда «Маҳалла» институтининг ўрни ва аҳамияти, шунингдек, ижтимоий масалаларни ҳал этиш юзасидан хабардор қилиш мақсадида ташкил этилган эди.
