Ўзбекистон президенти Шавкат Мирзиёев «Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида"ги фармонни имзолади, деб хабар қилди «Ўзбекистан 24» телеканали.
Ўзбекистон мустақиллигининг 30 йиллиги арафасида имзоланган ҳужжат билан 215 нафар фуқаро афв этилди.
Афв этилган шахсларнинг 3 нафари жазодан тўлиқ озод қилинди, 127 нафари — жазони ўташ муддатидан илгари шартли равишда озод этилди, 12 нафарига эса тайинланган жазо енгилроғи билан алмаштирилди. Бир сўз билан айтганда 142 нафар шахс озодликдан маҳрум қилиш жойларидан яқинлари бағрига қайтарилди.
Шунингдек, 73 нафар шахсга озодликдан маҳрум этиш жазоси қисқартирилди, яна бир маҳкумнинг жазоси озодликни чеклаш шаклидаги жазо турига ўзгартирилди.
Афв этилганларнинг 14 нафарини аёллар, 12 нафарини 60 ёшдан ошганлар, 69 нафарини хориж фуқаролари ҳамда 15 нафарини тақиқланган ташкилотлар фаолиятида қатнашган шахслар ташкил этади.
Афв этилганларнинг ижтимоий мослашуви, уларни фойдали меҳнатга жалб этиш ва соғлом турмуш тарзини йўлга қўйишга кўмаклашиш юзасидан масъул вазирлик ва идоралар ҳамда ҳокимликларга тегишли топшириқлар берилди.
Ўтган йили мустақилликнинг 29 йиллиги арафасида президент 113 нафар шахсни афв этган эди.
Умуман, сўнгги 5 йилда Ўзбекистонда 16 марта афв эълон қилиниб, 4965 нафар шахс кечирилган.
