Президент Шавкат Мирзиёев 24 август куни бўлиб ўтган экология муаммоларига бағишланган видеоселекторда Зомин тоғларида рўй берган ўрмон ёнғинлари бўйича ҳам тўхталди.

«Экология бизнинг ҳаёт-мамотимиз. Ҳар бир вилоят ҳокими шахсан келиб, бош вазирга келиб тақдимот қилади. Мен ўзим қишлоққа бориб қаттиқ ўйга толаман, Зоминда ёнғин бўлди, бир бойваччанинг ўғли шу ишни қилибди. Ҳозир прокуратура шуғулланяпти, чорасини кўрамиз», дея давлат раҳбарининг сўзларини келтиради Kun.uz.

Давлат раҳбари, шунингдек, Тошкент вилоятининг Бўстонлиқ туманида аҳвол ҳам яхши эмаслиги, ҳаммаёқ чанг-тўзонлиги ҳақида гапирди. Унинг қўшимча қилишича, ушбу масала бевосита бош вазирга топширилган.

Аввалроқ, ҳукумат қарори билан Чорвоқ сув омбори атрофидаги ва унга туташ ҳудудларда, ўрмон билан қопланган ва ўрмон барпо қилиш мумкин бўлган қишлоқ хўжалик ерлари чорвачиликка тақиқ қўйилган ҳолда ўрмон фондига ўтказилиши ҳақида хабар берилган эди.

Эслатиб ўтамиз, август ойи бошида Зомин туманидаги «Дуоба» ҚФЙ Ўриклисой қишлоғи дала майдонида ёнғин содир бўлди. Ёнғинни ўчиришга 4 та вертолёт, ФВВнинг 370 дан ортиқ ходимлари билан бирга Миллий гвардия, ИИБ, Давлат экология қўмитасидан ҳам куч ва воситалари жалб қилинганди.

Мудофаа вазирлигининг вертолётлари томонидан Зоминдаги ўрмон ёнғинини ўчираётганда ҳаводан оловга 30 тоннадан зиёд сув ташланган эди.