Президент Шавкат Мирзиёев «Янги Ўзбекистон» газетасига берган интервьюсида мамлакатда коррупцияга қарши олиб борилаётган кураш масаласига тўхталиб ўтди.
Шавкат Мирзиёевнинг маълум қилишича, 2020 йилда турли даражадаги мансабдорлар томонидан содир этилган жиноятлар учун 1723 шахс жиноий жавобгарликка тортилган.
«Фуқаролар, кенг жамоатчилик томонидан қизғин муҳокама қилинаётган барча муаммолар эътибор қаратишни талаб этади. Уларни инкор қилиш мумкин ҳам эмас. Албатта, жамиятдаги қонун бузилиши, адолатсизлик, инсон ҳуқуқларига беписанд муносабат, коррупция билан боғлиқ ҳолатларга бепарво қараб бўлмайди. Тизимли тус олган ёки жузъий муаммо бўладими, уларнинг барчасига дарҳол муносабат билдириб, тагига етиш ва ҳал этиш зарур», — деди президент.
Давлат раҳбарининг қайд этишига кўра, коррупционерлар томонидан етказилган зарар 500 млрд сўмни ташкил этган. 2021 йилнинг беш ойида эса 1696 нафар мансабдорга нисбатан жиноий иш очилиб, етказилган зарар 450 млрд сўмни ташкил этмоқда.
«Ҳеч шубҳасиз, бу моддий зарарлар айбдорлардан ундириб олинади. Коррупция балосини жамиятимиз ҳаётидан йўқ қилишга қаратилган сиёсат келгусида ҳам қатъий давом эттирилади», — деди Шавкат Мирзиёев.
Шавкат Мирзиёев май ойида ўтказилган видеоселектор йиғилишида коррупциянинг олдини олиш учун соҳаларни рақамлаштириш зарурлигини таъкидлаган эди.
