Коронавирусга қарши курашиш штаби аъзоси, Санитария-эпидемиологик осойишталик ва жамоат саломатлиги хизмати раҳбари ўринбосари Нурмат Отабеков қандай ҳолатларда коронавирусга қарши эмланишга тиббий чекловлар бўлиши ҳақида маълумот берди.

Унинг таъкидлашича, COVID-19га қарши эмлашга монеълик (тўсиқ) қилувчи ҳолатлар қуйидагилар ҳисобланади:

  • вакцинанинг компонентларига юқори сезгирлиги бўлган шахслар;
  • анамнезида оғир аллергик реакциялари бўлган шахслар;
  • ўткир юқумли ва юқумсиз касалликлар билан касалланганлар;
  • ҳомиладор ва эмизувчи аёллар;
  • 18 ёшгача бўлган болалар;
  • ОИВ инфекциясига чалинган шахслар.

Шунингдек, коронавирус инфекциясининг ўткир шакли симптомлари бўлган беморлар, лабораторияда COVID-19 мусбат натижа берган, бироқ клиник белгилари кузатилмаётган шахслар ва коронавирусга чалинган беморлар билан мулоқотда бўлган шахслар, карантин муддати тугаганидан сўнг эмланишлари ҳақида айтилди.

Н️урмат Отабековнинг қайд этишича, барча турдаги эмлашларни амалга оширишдан аввал, шифокор эмланувчи шахсда аллергик реакциялар бор ёки йўқлигига аниқлик киритиши лозим ва олдинги эмлашлардан сўнг оғир аллергик реакциялар кузатилган бўлса, у ҳолда эмлашдан тиббий чеклов берилиши керак.

Шунингдек, шахсга қон ва унинг компонентлари қуйилган тақдирда COVID-19га қарши эмлаш:

  • эритроцитар ёки лейкоцитар масса қуйилганида 6 ойдан кейин;
  • тромбоцитар масса ёки плазма қуйилганида 7 ойдан кейин;
  • иммуноглобулин юборилган ҳолатда короновирус инфекциясига қарши эмлаш иммуноглобулин юборилганидан 3 ойдан кейин;
  • гриппга қарши эмланган бўлса — 1,5 ойдан кейин
  • бошқа турдаги вакцина, иммуноглобулин, зардоб ва анатоксинлар билан эмланган тақдирда 1 ойдан кейин амалга оширилиши керак.

Олдинроқ, «Газета.uz» коронавирусга қарши эмланганлик тўғрисида сертификатни қандай олиш мумкинлиги тўғрисида қўлланмани тақдим қилган эди.