Энергетика вазири Алишер Султонов коронавирусга қарши вакцинациянинг тўлиқ курсини икки маротаба ўтган. Бу ҳақда вазирлик матбуот котиби «Газета.uz» га хабар берди. Унинг маълум қилишича, вазир декабрь ойида тўлиқ курсни ва май ойида яна бир тўлиқ курсни тугатган.
«Нима вакцина бўлса ҳам олиш керак. Мана мен сизларга айтаман, жуда ҳам кўп яқинларим касал бўлди. Худога минг шукур, ёши катта бўлса ҳам вакцина қилган эканман уларга. Ўзимга ҳам қилганман, оиламдагиларга қилганман. Мана, ёнимдагила ким касал бўлган бўлса, енгил ўтди. Ишхонадагиларга ҳам, ҳаммага қилдирганман. Биринчи марта декабрда олганман, иккинчи марта икки ой олдин (майда — таҳр.) олганман», — деган эди Алишер Султонов «Газета.uz» мухбирига берган интервьюсида.
Вазир айнан қайси вакцина билан эмлангани маълум қилинмади.
Қайд этиш жоиз, декабрь ойида Ўзбекистонда ўзбек-хитой вакцинасининг учинчи босқич синовлари ўтказилаётган эди. 1 апрелдан бошлаб COVID-19га қарши вакцинация жараёни бошланган.
Аввалроқ, Ташқи ишлар вазири Абдулазиз Камилов COVID-19 га қарши тўли эмлангани ҳақида хабар берган эдик.
