Аргентина терма жамоаси ҳужумчиси, «Барселона»нинг собиқ ўйинчиси Лионель Месси Франциянинг «Пари Сен-Жермен» жамоаси билан шартнома имзолади, дея хабар қилди клуб расмий сайти.
Сешанба, 10 август куни 34 ёшли футболчи Франция пойтахтига учиб борди ва тиббий кўрикдан ўтганидан сўнг Париж клубининг расмий ўйинчисига айланди. Шартнома яна бир мавсумга узайтириш имконияти билан икки йилга имзоланди.
Ўтган ҳафтада «Барселона» «молиявий ва тузилмавий» тўсиқлар сабабли Месси билан шартнома муддатини узайтира олмаган эди. Олти карра «Олтин тўп» соҳиби 21 йиллик фаолиятдан сўнг жамоани тарк этди.
