9 августдан бир ҳафта давомида Ўзбекистондаги барча эмлаш пунктларида хитой-ўзбек вакцинасининг фақат биринчи дозаси билан эмлаш ишлари амалга оширилиши, шу муддат ичида вакцинанинг иккинчи ва учинчи билан эмланилмаслиги ҳақида ёзган эдик.
Бунинг ортидан аҳоли орасида «бу хавфсизми» деган савол туғила бошлади. Инновацион ривожланиш вазирлиги Ахборот хизматининг расмий баёнотида бу вакцинация жараёнига салбий таъсир кўрсатмаслиги маълум қилинди.
«Эмлашнинг қисқа муддатли кечиктирилиши биринчи ёки иккинчи дозадан кейин вакцина туфайли организмда ҳосил бўладиган антитаналар миқдорига ёки бошқа кўрсаткичларга таъсир кўрсатмайди», — дейилади хабарда.
Илмий-тадқиқотлар ҳамда кўп сонли аҳоли ўртасидаги оммавий эмлашнинг дастлабки натижаларига кўра, Хитой дори воситаларини назорат қилиш агентлиги (CDC) томонидан вакцинанинг 1-дозаси ва 2-дозаси ўртасидаги оралиқни 2 ойгача чўзишга, иккинчи ва учинчи дозалар оралиғини эса 3 ойгача чўзишга рухсат берилган. Ушбу амалиёт Хитойда жорий қилинган, дея таъкидлашди Инновацион ривожланиш вазирлигида.
Маълумотлара кўра, ҳозирда Хитойда ZF-UZ-VAC2001 вакцина билан 0, 2, 6 ой схемасида 140 млн киши эмланган.
«Тадқиқотлар иккинчи ва учинчи дозалар оралиғидаги вақтнинг узайиши кўпроқ антитаналарнинг ҳосил бўлиши ва у кўпроқ муддат давомида сақланиб қолишига замин яратишини тасдиқламоқда», — дея Biorxiv сайтидаги мақолага таянган ҳолда ишонтирмоқда вазирлик.
ZF-UZ-VAC-2001 вакцинасини ишлаб чиқарувчилар томонидан берилган маълумотларга кўра, иккинчи ва учинчи доза ўртасидаги вақт интервалини ошириш коронавируснинг турли штаммларига нисбатан нейтраллашувчи титрларининг ошишига олиб келади.
Ўзбек-хитой вакцинасини фақат 1-доза билан эмлашга кўрсатма берилиши туфайли ижтимоий тармоқларда тарқалган «вакцинанинг аҳоли билмайдиган қандайдир ножоиз таъсири чиққани» тўғрисидаги тахминлар ёки «вакцина етишмас экан» деган миш-мишлар асоссиз, дейилади хабарда.
«Агар вакцинанинг ножўя таъсири аниқланганида, Соғлиқни сақлаш вазирлиги томонидан аҳоли ZF-UZ-VAC2001 вакцинасининг 1-дозаси билан эмланишига рухсат берилмаган бўлар эди. Қолаверса, жорий йилнинг 5−6 август кунлари 2 млн.доза ZF-UZ-VAC2001 вакцинаси юртимизга олиб келинди ва шу ойнинг ичида яна 2 млн доза олиб келинади. Ҳукумат томонидан Ўзбекистонда икки турдаги вакцинани, жумладан, ZF-UZ-VAC2001 вакцинасини ишлаб чиқариш бўйича амалий ишлар олиб борилмоқда ва август ойининг охирига қадар бу ишлар йўлга қўйилади», — дея қўшимча қилинган вазирлик баёнотида.
