Коронавирусга қарши эмлаш кампанияси 2021 йил январидан июлгача Германияда COVID-19 дан минглаб ўлимларнинг олдини олди. Бу Роберт Кох институти (RKI) томонидан эълон қилинган математик моделлаштириш натижаларига кўра маълум бўлмоқда, деб ёзади Deutsche Welle.
Таҳлил қилиш учун мутахассислар эпидемиологик вазият ривожланишининг турли сценарийларини моделлаштиришган: эмлаш кампанияси билан бирга ва у билан бўлмаган ҳолатда.
RKI маълумотларига кўра, дориларсиз профилактика чоралари ва вакцинация 706 минг инфекция юқиши ҳолатининг олдини олишга, касалхоналардаги беморлар сонини 76,6 мингга камайтиришга ёрдам берган (улар орасида 19,6 мингга яқин реанимацияга муҳтож беморлар ҳам бор). 38,3 мингдан ортиқ COVID-19 ўлимининг олди олинган.
Жонс Хопкинс университети (АҚШ) маълумотларига кўра, пандемия бошланганидан бери Германияда 3,8 миллион COVID-19 га чалиниш ҳолатлари қайд этилган, деярли 92 минг киши вафот этган. Мамлакат аҳолисининг деярли 55 фоизи тўлиқ эмланган.
