7 август куни Марказий сайлов комиссиясининг матбуот марказида ОАВ вакиллари ва блогерлар билан «галстуксиз учрашув» бўлиб ўтди. Унда «Газета.uz» мухбирининг амалдаги президентнинг ўз иш вазифаси ва сайловолди тарғиботи аралаштириб юборилмаслиги назорат қилиниши ёки йўқлиги тўғрисидаги саволига ҳам жавоб берилди.
МСК аъзоси Шерзодхон Қудратхўжанинг сўзларига кўра, Ўзбекистон президенти учрашувлари ва мажлислари ортида пиар ётгани йўқ.
«Амалдаги президент кунора ўзларини иш фаолиятларида мажлис ўтказадилар, учрашувлар бўлади. Бундан мақсад уларни (Шавкат Мирзиёевни — таҳр.) пиар қилиш эмас. Буни мақсади шу одамни шаффофлигини кўрсатиш… Бизда нимагадир сайловда кучлини орқасидан кучсизлар куч олгиси келади, лекин бу йил унақа бўлмайди. Мен ўйлайманки, амалдаги президент фаолияти ҳам эътиборга олиниши керак. Биз ҳар тарафлама, қонунан берилган вақтга эътибор қаратамиз ва ўйлаймизки, амалдаги президент ҳам бундан (қонун талабидан — таҳр.) чиқмайди. Характерларини ўзинглар билсанглар керак», — деди у.
Унинг сўзларига кўра, «лекин, сайловолди ҳаракатлар Шавкат Мирзиёевнинг бугунги фаоллигини, жумладан, ташрифлари ва амалга ошираётган ишларини сусайтириши керак эмас».
«Албатта ҳар ҳафта вилоятга чиқадилар, ҳар ҳафта учрашувлар бўлади. Буни тагида пиар ётмайди. Буни тагида кундалик фаолиятни ёритиш ва қилинаётган ислоҳотларни кўрсатиш ётибди. Лекин, Марказий сайлов комиссияси кузатади ва биз мониторинг қиламиз. Албатта, ажратилаётган маблағ ҳам, телевидениядаги вақт ҳам кузатилади», — деди МСК аъзоси.
Марказий сайлов комиссияси раиси ўринбосари Баҳром Қўчқоров.
Марказий сайлов комиссияси раиси ўринбосари Баҳром Қўчқоров ҳам тарғибот жараёнлари тўлиқ назорат қилинишини маълум қилди.
«Албатта, номзодни сайловолди тарғиботи ва ўзининг фаолиятини адаштирмаслигимиз керак. Лекин назорат қилинади, қонунда берилган вазифани ҳаммамиз бажариб беришимиз керак. Назорат қилинадиган қисмини назорат қилиб беришимиз керак. Лекин бошқа номзодларни ҳам ҳеч ким ўзининг фаолиятини амалга оширишдан чеклаб қўяётгани йўқ. Улар ҳам ўз фаолиятини амалга ошириши мумкин», — деди у.
У сайлов ташвиқотига оид қоидалар борлигини, уларга тўлиқ риоя қилиш кераклигини эслатиб ўтди.
«Давлат ресурсларини ишлатиш бўйича Сайлов кодексига киритилган ўзгартиришларимиз бор. Мана шунга риоя қилишимиз ва буни таъминлаб беришимиз керак. Бу барчамиз биргаликда ҳаракат қилинадиган масала», — деди Баҳром Қўчқоров.
Аввалроқ, Ўзбекистондаги бешта сиёсий партиянинг президент сайлови учун ўз номзодларини эълон қилгани ҳақида ёзган эдик.
