«Ижтимоий фикр» республика жамоатчилик фикрини ўрганиш Маркази COVID-19 га қарши эмланиш борасидаги жамоатчилик фикри ва уларнинг коронавирусга қарши эмланишга тайёр эмаслиги сабабларини аниқлаш ва уларнинг ечимини топишга қаратилган социологик тадқиқот ўтказди. Тадқиқотнинг асосий мақсадларидан бири фуқароларнинг эмланишдан бош тортиши сабабларини аниқлашдан иборат.
Маълумотга кўра, мазкур сўровда республиканинг барча ҳудудларидан эркаклар ва хотин-қизлар, ёшлар ва ундан катта ёшдаги фуқаролар, шаҳар ва қишлоқ жойларида яшовчи фуқаролар иштирок этишган.
Қайд этилишича, телефон орқали ўтказилган сўровда мамлакат фуқароларининг 53,2 фоизи коронавирус инфекциясига қарши эмланишга тайёрлигини тасдиқлашган. Сўралганларнинг учдан бир қисмидан кўпроғи (36,5 фоизи) эмланишдан бош тортмоқда.
Фото: Нигоҳ
«Сўровда иштирок этган ҳар ўнинчи фуқаро жавоб беришга қийналган, бу уларнинг ҳали COVID-19 га қарши эмланиш тўғрисида якуний қарор қабул қилмаганлигидан далолат бериб турибди», дея қайд этди «Ижтимоий фикр» ахборот хизмати.
Телефон орқали ўтказилган сўров натижаларига кўра, эмланишга тайёрлик мамлакатнинг эркак аҳолиси орасида 17,4 фоизга юқори бўлиб, 60,7 фоизни ташкил этади. Аёллар орасида эмланишга тайёрлар ва COVID-19 га қарши эмланишни истамайдиганлар фоизи тахминан бир хил: 43,3 фоиз аёллар эмланишни истайди, 45,2 фоизи истамайди.
Фото: Нигоҳ
Ёш кесими коронавирус инфекциясига қарши эмланишга тайёрликнинг энг юқори кўрсаткичи 45−54 ёшдаги фуқаролар орасида аниқланган. Эмланиш борасида бир қарорга келмаган фуқароларнинг энг юқори даражаси 18 ёшдан 24 ёшгача бўлган ёшлар орасида аниқланди ва 28,4 фоизни ташкил қилди.
«Сиз қанча вақт ичида COVID-19 га қарши эмланмоқчисиз?», деган саволга жавоб беришда 37,1% фуқаролар келаётган ҳафтада эмланишга тайёрлигини билдиришди. 25,7% телефон сўрови иштирокчиларининг фикрига кўра, улар бир ой ичида эмланишни бошлашлари мумкин. Ҳар ўнинчи респондент (11,3%), поликлиникага чақирилган тақдирда эмланишга тайёр эканлигини таъкидлади. Фуқароларнинг кичик фоизи (1,6%) эмланишни узоқроқ муддатга кечиктиради. Ҳар бешинчи респондент эмланишга тайёр бўладиган вақт ҳақидаги саволга жавоб беришга қийналган.
Олинган маълумотларга асосан 35,9% фуқаролар вакцинанинг эҳтимолий ножўя таъсирлари борасидаги хавотирлари ва уларнинг эмланишига тиббий қарши кўрсатмалар (кучли ножўя реакцияларга дуч келмаслик учун) мавжудлигини COVID-19 га қарши эмланишни рад этишнинг асосий сабаблари сифатида айтишган.
«Ижтимоий фикр»нинг қайд этишига кўра, телефон сўрови 34,2% фуқаролар коронавирус инфекциясига қарши эмланишга зарурат кўришмаётганини ва COVID-19 га чалиниши мумкинлигига ишонишмаётганини кўрсатган. Ушбу тоифадаги фуқароларнинг фикрига кўра, «жаҳонда коронавирус инфекцияси атрофида юзага келган вазият кўп жиҳатдан ўйлаб топилган, унинг хавфи жудаям ошириб юборилган, бундан ташқари, ушбу фуқароларнинг касаллик уларни четлаб ўтишига ишончи комил».
Телефон интервьюлари давомида COVID-19 га қарши эмланишга нисбатан салбий муносабатда бўлган фуқароларнинг 16 фоизи вакцинанинг коронавирусдан самарали ҳимоя қилишига шубҳаланишини таъкидлаган. Уларнинг фикрича, «бугунги кундаги мавжуд вакциналар уларнинг хавфсизлигини ва самарадорлигини тасдиқлаши мумкин бўлган етарлича тадқиқотлар ва клиник синовлардан ўтмаган».
8,6% респондентлар эмланишни самарасиз, деб ҳисоблайдилар. Улар коронавирусга қарши мавжуд вакциналар аҳолининг касални юқтириш хавфини камайтириши ва уларнинг ҳаёти ва саломатлигини ҳимоя қилиши мумкинлигига ишонишмаётганилигини маълум қилишган.
Телефон орқали сўров ўтказиш вақтида эмланиш керакми ёки йўқлиги борасида аниқ позицияга эга бўлмаган гуруҳ ҳам аниқланган.
«Ижтимоий фикр» COVID-19 га қарши вакциналар ҳақида, улар таъминлайдиган ҳимоя даражаси ҳақида текширилган илмий маълумотларга асосланган ишончли ахборотни тақдим этишга қаратилган ахборот ишларини фаоллаштириш зарурлигини таъкидлади.
«Ижтимоий сўров натижалари шуни кўрсатадики, бугунги куннинг асосий вазифаларидан бири аҳоли ўртасида оммавий эмлаш зарурлиги ҳақида маърифий ишларни олиб бориш, айрим фуқароларнинг эмлашдан олдинги қўрқув ва мутаассибликни енгиш», дейилади хабарда.
