Соғлиқни сақлаш вазирлиги ижтимоий тармоқларда «Спутник V» вакцинасининг компонентлари етишмовчилиги кузатилаётгани ҳақидаги хабарларга жавоб берди.
Қайд этилишича, шу кунга қадар Ўзбекистонга 370 минг доза «Спутник V» вакцинаси олиб келинган. Уларнинг 230 минг дозаси 1 — компонент, 140 минг дозаси 2-компонент ҳисобланади. 4 август ҳолатига кўра, 341 минг 260 доза «Спутник V» эмлаш жараёнларида қўлланилган бўлиб, 212 минг 818 нафар шахс вакцинанинг фақат биринчи дозасини олган. 128 минг 442 нафар фуқаро 2-дозани ҳам қабул қилиб, тўлиқ эмланган.
«Маълум бўлмоқдаки, вакцинанинг ҳар иккала компонентлари миқдори тенглашиши учун Ўзбекистонга яна 90 минг доза вакцина келтирилиши керак. «Спутник V»нинг 90 минг дозалик 2-компоненти яқин кунларда Ўзбекистонга келтирилиши кутилмоқда», — дейилади ССВ хабарида.
Қолаверса, Гамалея номли илмий тадқиқот институти директори Александр Гинцбург ва соҳанинг қатор нуфузли олимлари «Sputnik V» вакцинасининг биринчи ва иккинчи компонентлари билан эмланиш оралиғини 21 кундан 90 кунгача узайтириш мумкинлигини маълум қилишган.
«Хулоса қилиш мумкинки, вакцинанинг компонентларини қабул қилиш оралиқ муддати узайиши ҳам унинг таъсир кучига монелик қила олмайди», — дейилади хабарда.
Эслатиб ўтамиз, июль ойининг ўрталарида Ўзбекистонга Россиядан «Спутник V» вакцинасининг 70 минг дозалик 1-компоненти, 20 минг дозалик 2-компонентини етказиб берилган эди.
Шунингдек, Ўзбекистон «Спутник V» вакцинасини Россиядан сертификат олинганидан кейин ишлаб чиқаради. Jurabek Laboratories ишлаб чиқариш директорининг маълум қилишича, компания биринчи босқичда 2 млн доза «Спутник V» ва 10 млн доза хитой-ўзбек вакциналарини ишлаб чиқаришни режалаштирган.
