Олий Мажлис Сенатининг Ёшлар, маданият ва спорт масалалари қўмитаси Ижтимоий тармоқларда «Бизни қул қилиб сотиб юборганмисизлар?» сарлавҳа остида эълон қилинган видеомурожаат бўйича ўрганиш олиб бориши ҳақида хабар берилган эди. Қўмита томонидан ушбу масала юзасидан Бандлик ва меҳнат муносабатлари вазирлигига сўров ҳам юборилган.
Ўрганиш натижаларида аниқланишича, Ташқи меҳнат миграцияси агентлиги ва Россиянинг Карачаево-Черкесия Республикасидаги «Южный Агрокомбинат» АЖ ўртасида 2021 йил 14 июнь куни келишув шартномаси имзоланган.
Шартнома шартларига мувофиқ, 400 нафар фуқаро қишлоқ хўжалиги соҳасида ишлаши учун иш берувчи томонидан танлаб олиниши, ишга жалб қилиниши ва уларинг ойлик маошлари 33 минг рублдан 50 минг рублгача ташкил этиши белгиланган.
Фуқароларнинг авиачипта ва ҳужжатларни расмийлаштириш (патент) харажатлари иш берувчи ҳисобидан тўланган, ушбу харажатлар кейинчалик фуқароларнинг ойлик маошларидан қисман ушлаб қолиниши келишилган. Агарда фуқаролар 1 йил ишласа, ушлаб қолинган харажатлар иш берувчи томонидан тўлиқ қоплаб берилиши айтилган.
Жорий йилнинг 16 июнь куни иш берувчи ва Ташқи меҳнат миграцияси агентлигининг Андижон вилояти филиали томонидан 150 нафар фуқаро танлаб олинган. 23 июнь куни уларнинг 63 нафари, 29 июнь куни 22 нафари, 4 июль куни 16 нафари ва 5 июль куни 42 нафари «Южный Агрокомбинат» АЖга меҳнат фаолиятини амалга ошириш учун юборилган.
Фуқаролар иш жойига етиб борганидан сўнг, Ташқи меҳнат миграцияси агентлигига телефон орқали меҳнат ва яшаш шароитлари ноқулайлиги ҳамда паспорт ҳужжатлари иш берувчи томонидан олиб кўйилгани тўғрисида бир қатор мурожаатлар келиб тушган.
Шу сабабли, Ташқи меҳнат миграцияси агентлиги бошлиғи ўринбосари бошчилигида Ишчи гуруҳ тузилиб, 14 июль куни Россиядаги мазкур корхонага борган.
Ишчи гуруҳ корхона раҳбарияти ва фуқаролар билан учрашиб, уларнинг мурожаатларида кўтарилган масалалар бўйича музокара олиб борган. «Иш берувчи фуқароларнинг паспортлари миграцион қайдга қўйиш ва ишлаш учун патент расмийлаштириш мақсадида олинганлиги ҳамда фуқароларнинг биринчи талаби билан қайтариб берилиши маълум қилинди», дейилади хабарда.
Корхона раҳбари ўзбекистонлик ишчилар билан меҳнат муносабатларини қонунга мувофиқ расмийлаштириши, барча шароитларни яратиб бериши ҳамда бугунги кунда яна 500 нафар қўшимча ишчи кучи жалб қилиш режаси борлигини маълум қилган.
Ҳозирги кунда мазкур корхонада 155 нафар Ўзбекистон фуқароси меҳнат фаолиятини амалга ошираётгани, шундан 46 нафари 2019 йилдан буён Самарқанд вилоятидан келиб ишлаётгани ва 109 нафари Андижон вилоятидан шу йилнинг июлида келгани аниқланган.
«Ишчи гуруҳ корхона раҳбарияти билан Ўзбекистон фуқароларининг яшаш ва меҳнат шароитларини яхшилаш, ойлик маошларини ўз вақтида тўлаб бериш ҳамда ҳужжатларни расмийлаштириш жараёнини тезлаштириш бўйича келишув далолатномасини расмийлаштирган», — дейилади Сенат хабарида.
Корхонада ишлаётган Ўзбекистон фуқароларига ушбу келишувнинг мазмун-моҳияти, ойлик маошларини тўлаш тартиби, иш вақти ва ҳужжатлар расмийлаштириш жараёнлари тушунтирилган. Жумладан, фуқаролар видеомурожаатида айтиб ўтилган 125−130 рубль маош бир кунлик эмас, балки бир соатлик иш ҳақи эканлиги маълум қилинган.
Видеомурожаат фуқароларнинг биринчи иш кунида олингани ва бир соатга тўланадиган иш ҳақи бир кунга берилади деб, нотўғри тушунилгани айтилмоқда.
Бугунги кунда Ташқи меҳнат миграцияси агентлиги ва унинг Россия Федерациясидаги ваколатхонаси томонидан ушбу корхонада фаолият олиб бораётган фуқаролар билан мунтазам равишда алоқа ўрнатилиб, уларнинг яшаш ва ишлаш шароитлари доимий назоратга олинган. Ишчи гуруҳ 29 июль куни корхонага такроран юборилган.
Бундан ташқари, ижтимоий тармоқларда юкоридаги видеомурожаат жойлаштирилганидан бир кун ўтиб унинг муаллифи Н.Назиров томонидан мурожаатдаги важлар асоссизлиги ва англашилмовчиликлар бўлгани тўғрисидаги мурожаат ижтимоий тармоқларга жойлаштирилгани айтилмоқда.
Шу билан бирга, фуқароларни ташкилий ишга жойлаштириш жараёнида камчиликларга йўл қўйганлиги сабабли Ташқи меҳнат миграцияси агентлигининг Андижон филиали раҳбари Улуғбек Юлдошев билан меҳнат шартномаси бекор қилинган.
