29 июль куни президент Шавкат Мирзиёев бошчилигида Олмалиқ кон-металлургия комбинатида 3-мис бойитиш фабрикаси қурилишининг бошланишига бағишланган маросим бўлиб ўтди.
«Газета.uz» мухбирининг хабар беришича, мазкур тадбирда сўзга чиққан SRK Consulting компанияси (АҚШ) директори Майк Бир Ўзбекистонда жаҳондаги энг йирик мис ва олтин захираси мавжудлигини айтган.
«Мен барчангизни Ўзбекистонда дунёдаги энг йирик мис ва олтин конини қуриш ва кейинчалик ишлаб чиқариш бошланиши билан табрикламоқчиман. SRK Consulting компанияси дунёнинг турли мамлакатларида ўз фаолиятини олиб боради ва тан олиб айтишим керакки дунёнинг ҳеч қайси давлатида бундай кўламдаги ва минералларга бой бўлган захиралар ҳали очилмаган», — деди у.
Унинг сўзларига кўра, электромобиллар ишлаб чиқариши ривожланиши ортидан жаҳон бозорида мисга бўлган талаб кун сайин ортиб боради.
«Ҳозирги кунда жаҳонда электр автомобилларини ишлаб чиқариш жуда катта тенденцияга айланиб бормоқда ва уларни ишлаб чиқариш жараёнида мис жуда ҳам кўп ишлатилади. Шунинг учун сиз (Шавкат Мирзиёев назарда тутилмоқда — таҳр.) олиб бораётган сиёсат узоқни кўзловчи сиёсат десак муболаға бўлмайди. Чунки, яқин ўртада жаҳон бозорида мисга бўлган эҳтиёж ортади. Ҳозир бизни қўлимизда, 19,5 млрд тоннага тенг бўлган руда бор. Бундан ташқари, 45 млн тонна мис ва 5,5 минг тонна олтин захираси мавжуд. Жаноб президент мен сизни ва Ўзбекистон халқини мана шундай ажойиб натижа билан табрикламоқчиман», — деди Майк Бир.
Президент матбуот хизматининг ёзишича, электр техникаси саноати жадал ривожланиши натижасида 2030 йилга бориб мисга бўлган эҳтиёж камида 40 фоизга ортиши кутилмоқда. «Бу Олмалиқ комбинати маҳсулотларига халқаро талаб узоқ йиллар давомида юқори бўлади, деганидир», — дейилади хабарда.
«Ёшлик-1» кони негизида қурилаётган 3-мис бойитиш фабрикасининг қиймати 2 млрд долларга тенг ва биринчи босқичда йилига 60 млн тонна руда қайта ишлаш имкони яратилади.
Иккинчи босқичда қувват 160 млн тоннага етади ёки бугунги кўрсаткичдан 3 баробарга кўпаяди. Ушбу икки босқич амалга оширилиши натижасида корхона 2028 йилга бориб йилига 400 минг тонна мис, 50 тонна олтин ва 270 тонна кумуш ишлаб чиқариш қувватига эга бўлади.
Бундан ташқари, тадбирда мис ва олтин бўйича қазилма бойликларга солиқ ставкаларини 10 фоиздан 7 фоизга, табиий газ ва нефть бўйича 10 фоизга, уран бўйича 8 фоизга, вольфрам бўйича 10 фоиздан 2,7 фоизга тушириш режалаштирилгани айтилди. Бундай имтиёзлар инвесторларда албатта катта қизиқиш уйғотиши таъкидланди.
