Ўзбекистон «Спутник V» вакцинасини Россиядан сертификат олинганидан кейин ишлаб чиқаради. Бу ҳақда Фармацевтика тармоғини ривожлантириш агентилиги директори Сардор Кариевга таяниб «Газета.uz» мухбири хабар бермоқда.
Кариевнинг таъкидлашича, Ўзбекистонда Jurabek Laboratories МЧЖ томонидан «Спутник V» вакцинасининг намуна дозалари ишлаб чиқарилган ва Россиянинг Гамалея институтига синовдан ўтказиш ва сертификация қилиш учун юборилган.
«Августнинг биринчи ҳафтасига ижобий жавобни кутяпмиз. Ундан кейин [Jurabek Laboratories] цехида ишлаб чиқарилади», — деди Кариев.
Jurabek Laboratories МЧЖ ишлаб чиқариш директори Фаррух Лутфуллаевнинг «Газета.uz»га таъкидлашича, завод томонидан биринчи босқичда 2 миллион доза «Спутник V» ва 10 миллион доза хитой-ўзбек вакциналарини ишлаб чиқариш режалаштирилган.
«Спутник V» вакцинаси қачон ишлаб чиқарилиши бўйича саволга у Гамалея институтидан хом-ашё келишини кутишаётганлигини таъкидлади. «Август ўрталарида қуйишни бошласак, август охирида етказиб беришни режалаштиряпмиз», — деди у.
Унинг қўшимча қилишича, хитой-ўзбек вакцинасини ишлаб чиқариш масалалари ҳозирда Хитойдан келган делегация томонидан ўрганилмоқда. Заводнинг техник ва технологик имкониятларига ижобий баҳо берилганидан кейин, Хитойга текширув учун Ўзбекистонда қуйилган вакцина намунаси юборилади ва синовдан ўтказилади.
Олдинроқ, Ўзбекистонга 1,2 млн доза Pfizer ва бошқа вакциналар олиб келиниши ҳақида маълумот берилган эди.
