Тез овқатланиш ресторанлари глобал тармоғи Burger King Ўзбекистон бозорига кирмоқда. Бу ҳақда Spot бир нечта манбаларига таяниб хабар бермоқда.

Ўзбекистондаги франшиза Burger King Uzbekistan бўлиб, унинг франчайзери Москва бўлади. Spot маълумотларига кўра, Тошкентда ООО Burgerhouse компанияси рўйхатга олинган, унинг устав фонди 1 млрд сўмга тенг. Шунингдек, ходимларни ишга олиш бошланган. Компания ушбу маълумотларни «Газета.uz»га ҳам тасдиқлади ва лицензион келишув бўйича музокаралар олиб борилаётганлигини маълум қилди.

Компаниянинг аниқлаштиришича, Тошкентда биринчи филиал шу йилнинг охиригача очилиши режалаштирилмоқда, лекин пандемия бунга таъсир ўтказиши мумкин.

Spot ёзишича, рестораннинг маъмурий-бошқарув персонали (директор ва менежерлар) учун ўқув машғулотлари Москвада бўлиб ўтади. Филиаллар қаерда жойлашиши бўйича маълумот ҳозирча ёпиқ.

Burger King аллақачон Ўзбекистонда ўзининг интеллектуал мулкини ҳимоя қилган (2014 йилда), лекин 17 май куни компания яна иккита товар белгисини рўйхатга олган. Ҳозирда улар кўриб чиқилмоқда.

Burger King 1954 йилда АҚШда ташкил топган. Гамбургерларга (асосан вопперлар) ихтисослашган тез овқатланиш ресторанлари тармоқлари орасида дунёда иккинчи ўринда туради.