Ўзбекистон Олимпия терма жамоаси вакиллари Токиода бўлиб ўтган ёзги Олимпия ўйинлари очилиш маросимида Ideal бренди костюмларида чиқди. Ўйинлар учун спортчиларнинг экипировкаси ва спорт кийимларини эса 7SABER тайёрлади. «Газета.uz» форма қай тарзда танлангани ва ишлаб чиқарувчилар ҳақида маълумот тўплади.
Миллий олимпия қўмитаси «Газета.uz»га Олимпия ўйинларининг очилиш маросимида чиқиш учун спортчиларнинг парад формасини Ideal (Ideal Business Center), экипировка ва спорт кийимларини эса 7SABER (Urban Hayot) бренди ишлаб чиқарганини тасдиқлади.
2020 йилнинг февралида МОҚда Токиода бўлиб ўтадиган Олимпия ва Паралимпия ўйинларида Ўзбекистон делегацияси учун спорт экипировкаси ва парад формаси тақдимоти бўлиб ўтди. Қўмита форма эскизини яратиш бўйича халқаро танловда 100 дан ортиқ номзодлар қатнашганини хабар қилганди. Танланган намуналар президент ва Ҳукуматга тақдим этилди, Шавкат Мирзиёев ўзининг ижобий фикрини билдирди, дейилганди хабарда.
Тошкент тўқимачилик ва енгил саноат институти проректори Ҳолида Комилова спортчиларнинг таснифига қараб, ҳар бир комплект индивидуал тарзда яратилишини таъкидлаганди.
Якунда эса спортчилар Токиога бошқа парад формаси ва бошқа экипировакада йўл олишди.
Ideal Business Center раҳбари Муҳаммаджон Қодиров «Газета.uz»га МОҚ Олимпия терма жамоаси учун парад формаси дизайни бўйича тендерни 2019 йилнинг охирида эълон қилганини маълум қилди.
«Тендер эълон қилинган ва дизайнерлар ўз лавҳалари, лойиҳаларини берган. Шундан 10 таси танланган. Ўнтасидан кейин сараланган 5−6 та лойиҳа бош вазирга кўрсатилган ва якуний натижа президент томонидан танлаган», — деди у.
Унинг сўзларига кўра, Ideal тасдиқланган дизайн асосида формани тикиш ишлари билан шуғулланган.
«Дизайнини танлашда ҳам қатнашганмиз. Конкурсда икки нафар номзоднинг дизайни тасдиқланган. Яъни битта дизайнернинг моделидан ранг олинган ва қолиплар, фасони эса бизники бўлган», — деди компания раҳбари.
Муҳаммаджон Қодиров гап дизайнни танлаш бўйича ўтказилган тендер ҳақида кетмоқда — тикиш билан шуғулланувчи компания эса олдиндан маълум бўлган.
«2016 йилдаги Олимпиадага ҳам формани биз тикканмиз. Жаҳон чемпионати боксёрлари ютиб келиб, байрамда оқ қостюм шимда чиқишди — уни ҳам биз қилдик», — деди у.
Президентнинг 25 июндаги қарорига мувофиқ, делегациянинг расмий экипировкаси (форма кийими — костюм, шим, кўйлак, галстук, белбоғ, оёқ кийими) умумий қиймати 430 млн сўмга (215 нафар иштирокчининг ҳар бирига 2 млн сўмдан) тушгани қайд этилган.
2020 йилги тақдимотдан Buka (бренд эгаси Buka Boxing Sportswear) логотипи туширилган формани кўриш мумкин. Бироқ спортчилар Токиога Urban Hayot экипировкасида йўл олди. 7SABER маҳаллий брендининг тақдимоти 25 июнь куни ўтказилган эди.
Шу билан бирга, айрим спортчиларда (Улуғбек Рашитов, Баҳодир Жалолов) баҳордан бери ушбу бренд формасида эканлигини кўриш мумкин.
7SABER`га таяниб Spot нашрининг хабар қилишича, бренд тарихи 2019 йил бошига бориб тақалади. Ўшанда Триатлон федерациясининг собиқ раҳбари Отабек Умаров бутун дунёга машҳур бўлган иконкалар асосида турли спорт турларини тасвирлайдиган график элементни яратган.
Отабек Умаров томонидан яратилган график белги.
Узоқ вақт мобайнида логотипнинг тижоратга ҳеч қандай алоқаси йўқ эди: муаллиф уни спорт ташкилотлари ва ишлаб чиқарувчилари томонидан эркин фойдаланишига эътироз билдирмади.
Бу профессионал спортчилар билан бирга ишқибозлар орасида ҳам бирдек бренд машҳурлигининг ошишига таъсир кўрсатди. 7SABER`да буни миллий маркетингнинг намунаси деб аташди.
Ўзбекистон таэквондочилари Токиога сафари олдидан. Фото: МОҚ.
2020 йили спорт экипировкасини ишлаб чиқаришга сармоя киритмоқчи бўлган Дубайнинг Berkeley Square Investments компанияси Ўзбекистонда маркетинг ўрганишларини олиб борди. Элемент мамлакатда машҳурлик ва содиқликка эга эканлиги аниқланди, деб ёзади нашр.
Berkeley Square Investments раҳбарияти Ўзбекистонда ўз манфаатларини ифодаловчи Urban Hayot компанияси орқали муаллиф билан музокараларга киришди. Якунда эса лицензия битими имзоланди.
Эмблемадан фойдаланиш ҳуқуқи 5 йил муддатга Urban Hayot компаниясига ўтди. У 2020 йилнинг 2 декабрида Тошкентда рўйхатдан ўтган. Компания таъсисчилари Росс Коннон ва Ораз Абдуразаков (ҳозир акциялар қуйидагича тақсимланган: Berkeley Square Investments — 80,2%, Ораз Абдуразаков — 19,8%) ҳисобланади. Келишувга эришиш вақтида логотипнинг на фонетик эшитилиши, на аниқ номланиши бўлган — у фақат дизайнга эга эди.
Бренд яратилишига INSTID Лондон санъат институти ва Тошкент GRANDPR агентлиги жалб этилган ва шу тарзда 7SABER пайдо бўлган, деб ёзмоқда Spot.
Отабек Умаров шундай деган эди: «қалбга қадрли бўлган лойиҳанинг қайта туғилишини кўриш — жуда ажойиб туйғу».
«Бир неча йил аввал қалам эскизлари ва болалар спорт мактаблари учун илк кийимлар тўпламида яратилган ғоя кеча янги ёрқин бренд сифатида намойиш этилди. Бир нечта ихлосмандларнинг ташаббусидан катта сармоявий лойиҳага қадар бўлган йўл энг қисқа вақт ичида босиб ўтилди. Энди бошқалар лойиҳани давом эттирсинлар, мен аввал ихтиро қилган белги яхши қўлларда эканлигига шубҳам йўқ», — дея ёзганди ўзининг Instagram саҳифасида.
Ўзбекистонлик оғир атлетикачи Муаттар Набиева 7SABER спорт формасида. Фото: МОҚ.
Отабек Умаров, шунингдек, «Berkeley Square Investments компаниясидан энг асосий талаби ва олгани — камида 2000 та иш ўрни яратиш билан Ўзбекистонда спорт кийимлари ишлаб чиқаришни очиш кафолатлари» эканлигини қайд этган.
Президентнинг 25 июндаги қарори билан (ПП-5160) Ўзбекистон Миллий олимпия қўмитасига ҳамда Ўзбекистон Миллий паралимпия қўмитасига Олимпия ва Паралимпия ўйинларига тайёргарлик кўриш учун спорт анжомлари, жиҳозлар, ускуналар, делегация расмий либослари, спорт кийимлари (экипировкаси), спорт тиббиёти жиҳозлари, тиббий-биологик препаратлар харид қилиш бўйича хорижий ва маҳаллий ишлаб чиқарувчилар билан шартномаларни, шунингдек, ўқув-машғулот йиғинлари бўлиб ўтадиган спорт базалари, ётоқхона, спорт заллари ва спорт жиҳозлари ижаралари тўғрисида ҳамда овқатланишни ташкил қилиш юзасидан шартномаларни тўғридан-тўғри расмийлаштириш ва тўловларни амалга оширишга рухсат берилди
Шунингдек, истисно тариқасида, давлат харидлари бўйича махсус ахборот порталида тегишли эълон жойлаштирмасдан ва электрон савдоларсиз, тендерсиз, тўғридан-тўғри расмийлаштириш ва тўловларни амалга оширишга рухсат берилди.
