Сузиш федерацияси бош котиби Алишер Ғаниев вақтинча ишдан четлатилди, дея хабар бермоқда Миллий олимпия қўмитаси ахборот хизмати.
Туризм ва спорт вазирлигининг тақвим режасидан ўрин олган, Халқаро сузиш федерацияси (FINA) шафелигида ўтказилган сузиш бўйича лицензион Ўзбекистон очиқ чемпионатида юз берган вазият турли интернет нашрларида катта муҳокамаларга сабаб бўлмоқда. МОҚ ушбу ҳолат бўйича ўз позициясини билдирди.
Ўзбекистон сузиш федерациясининг хабар беришича, мусобақа якунланганидан кейин 21 апрель куни унда иштирок этган ҳиндистонлик спортчи Ликит Селвараш Према турнир давомида ноҳақликка йўл қўйилгани, маҳаллий спортчиларнинг вақтлари нотўғри кўрсатилгани ҳақидаги видеомурожаатини YouTube ижтимоий тармоғига жойлаган.
Қўмитанинг қайд этишича, лицензион Ўзбекистон очиқ чемпионатларига МОҚ раҳбарияти доимий ташриф буюриб турган, тезкор штаб вакили Мирсардор Алимов ҳам мусобақани мунтазам кузатиб борган. Мусобақадан сўнг шу ернинг ўзида кичик йиғилиш ташкил этиб, тайёргарлик жараёнини янада кучайтириш, машғулотлар сифатини ошириш бўйича мутасаддиларга тегишли кўрсатмалар берилган.
МОҚнинг таъкидлашича, турнир якунлангач, Сузиш федерацияси мусобақалар протоколини МОҚга тақдим қилган ва унда 5 нафар ўзбекистонлик атлетнинг Токио-2020 нормативини бажаргани кўрсатиб ўтилган. Тақдим этилган протоколларда белгиланган қоидаларнинг бузилиши, шу жумладан, кейинчалик ҳиндистонлик сузувчи томонидан қайд этилган воқеа ҳақида маълум қилинмаган. Шунингдек, бирор хорижий делегация томонидан, жумладан, Ҳиндистон жамоаси томонидан мазкур литсензион турнир бўйича шикоят тушмаганлиги айтилади.
«Сузиш федерациясининг маълумотига кўра, FINA ушбу турнирларда қайд этилган натижаларни тан олмади. Ўзбекистон сузиш федерацияси бош котиби Алишер Ғаниевнинг сўзларига кўра, FINA бу бўйича Тошкентга расмий хат жўнатмаган. Бироқ Ўзбекистон сузиш федерацияси бир неча бор FINAга тақдим этилган маълумотларга аниқлик киритиш учун хабар йўллаган ва ҳатто бу масала бўйича Спорт арбитраж судига (CАS) мурожаат қилган. Якунда эса халқаро ташкилот йўллаган „Universal Place“ асосида фақатгина 2 нафар ўзбекистонлик — Хуршиджон Турсунов ва Наталя Критинина Токио-2020 ўйинларига йўлланма олишди», — дея қўшимча қилинади хабарда.
Миллий Олимпия қўмитаси, шунингдек, Спорт фахрийлари кенгаши расмий равишда ушбу ҳолат ҳеч қандай спорт тамойилларига мос келмаслигини ва олимпизм қадриятларига мутлақо зид эканлигини маълум қилди.
Шундан келиб чиққан ҳолда Ўзбекистон сузиш федерацияси Президиумидан қуйидагиларни талаб қилади:
- Юқоридаги вазиятни кўриб чиқиш, ўрганиш ҳамда унга ҳуқуқий баҳо бериш учун Туризм ва спорт вазирлиги, Миллий Олимпия қўмитаси, Спорт фахрийлари кенгаши ва Сузиш федерацияси мутахассисларидан иборат ишчи гуруҳ тузиш;
- Халқаро сузиш федерациясидан (FINA) лицензион мусобақада қайд этилган натижаларнинг нима сабабдан бекор қилингани ҳақидаги материалларни тақдим қилишини сўраш;
- Федерация бош котиби Алишер Ғаниевни вақтинча ўз лавозимидан четлатилишини.
Миллий Олимпия қўмитаси бошқа федерациялар ва спорт ташкилотларидан ҳам белгиланган қоидаларга қатъий риоя қилишни сўради.
