Ўзбекистон президенти Шавкат Мирзиёев Германия президенти Франк-Вальтер Штайнмайер ва Федерал канцлери Ангела Меркелга ушбу мамлакат ғарбида рўй берган ҳалокатли тошқинлар оқибатида кўплаб инсонлар қурбон бўлгани муносабати билан таъзия йўллади. Бу ҳақда президент матбуот хизмати хабар бермоқда.
Давлат раҳбари ҳалок бўлганларнинг оила аъзолари ва яқинларига, бутун Германия халқига чуқур ҳамдардлик изҳор этиб, жароҳатланганлар тез фурсатда соғайиб кетишини тилади.
Дойче Велле маълумотларига кўра, Германиянинг ғарбий қисмида табиий офат қурбонлари сони 156 кишини ташкил этмоқда. 18 июль, якшанба куни эрталаб Кобленцеда полиция департаменти вакили хабар беришича, Рейнланд-Пфальц федерал ерида табиий офат қурбонлари сони яна 12 кишига кўпайиб, 110 кишига етди. Шимолий Рейн-Вестфалияда шанба, 17 июль кунининг кечки пайтигача 45 та ўлим қайд этилди.
Бундан ташқари, Берхтесгаденер-Ланднинг Юқори Бавария округида сув тошқини оқибатида камида битта одам вафот этди. Шундай қилиб, ҳозирги экологик офат пайтида ҳалок бўлганлар сони 2002 йилда Германия шарқида, Саксонияда 21 кишининг ҳаётига зомин бўлган «аср тошқини» натижасида ҳалок бўлганлар сонидан анча юқори.
