Ричард Брэнсоннинг Virgin Galactic компанияси ва Omaze маблағ йиғиш платформаси суборбитал тижорат парвозига иккита чипта учун лотереяни бошлади, дея хабар бермоқда Meduza.
Лотерея 1 сентябрга қадар ўтказилади ва чипталарни ким ютиб олганлиги 29 сентябрь куни эълон қилинади. Ғолиб фақат бир киши бўлади ва у иккита чиптани қўлга киритади.
Ўйинда иштирок этиш бепул, аммо ғолиб бўлиш имкониятини хайрия ташкилотларига 10 доллардан 100 долларгача маблағни ажратиш орқали ошириш мумкин.
2022 йилга режалаштирилган парвоздан ташқари, лотерея ғолибига трансфер, меҳмонхонада жой ва Ричард Брэнсон билан космодромга шахсий экскурсия ваъда қилинган.
Маълумотга кўра, иштирокчилар 18 ёшдан ошган бўлиши ва COVID-19`га қарши эмланган бўлиши керак. Бир киши 6000 тагача ариза юбориши мумкин.
2018 йилда британиялик миллиардер Ричард Брэнсоннинг Virgin Galactic компанияси SpaceShipTwo йўловчи космик шакллини синовдан ўтказган эди.
11 июль куни Брэнсон VSS Unity суборбитал ракетопланида коинотга парвозини муваффақиятли амалга ошириб, космик туризм эрасини бошлаб берди. 70 ёшли тадбиркор билан Unity 22 миссиясида икки нафар учувчи — Дэйв Маккей ва Майкл Масуччи ҳамда Virgin Galactic бош астронавт-инструктори Бет Мозес, бош амалиётчи муҳандис Колин Беннетт ҳамда ҳукумат билан алоқалар бўйича вице-президент, асл келиб чиқиши ҳиндистонлик бўлган авиацион муҳандис Сириша Бандла ҳам бор эди.
Парвоз қилишни кутаётганлар сони 600 кишини ташкил этиб, улар битта парвоз учун 250 минг доллар тўлашга тайёр.
