АҚШ президентининг ички хавфсизлик масалалари бўйича маслаҳатчиси Элизабет Шервуд-Рэндалл 15 июль куни Тошкентда «Марказий Осиё Мамлакатлари — АҚШ» (С5+1) форматидаги навбатдаги йиғилишида иштирок этди.
«C5 + 1 форумида биз якка ёки икки томонлама эмас, ҳамкорликда кўпроқ иш қилишимиз мумкин. Ушбу ёндашув президент [Жо] Байденнинг эътибори марказида. Бугун биз дуч келаётган — COVID-19 пандемиясидан тортиб, иқлим ўзгаришигача ва халқаро терроризм бўйича муаммолар — битта мамлакатнинг ўзи ҳал қила олиши учун жуда қийин», — деди Элизабет Шервуд-Рэндалл.
Америка президентининг маслаҳатчиси август ойининг охирида АҚШнинг Афғонистондаги ҳарбий миссияси 20 йилдан сўнг якунланишини эслатди. «Биз муносабатларнинг янги босқичига ўтамиз. Президент Байден айтганидек, бизнинг аскарларимиз уйга қайтаётганларида, Афғонистон ҳукумати ва афғон халқига бўлган садоқатимиз сақланиб қолмоқда», -дея қўшимча қилди у.
«Биз Афғонистон миллий мудофаа кучларига хавфсизлик, шунингдек ривожланиш ва гуманитар ёрдам кўрсатишда давом этамиз. Биз Қўшма Штатларга ва иттифоқчиларимиз ҳамда шерикларимиз хавфсизлигига, шу жумладан сизларнинг мамлакатларингизга таҳдид солувчи террористик гуруҳларга қарши агрессив ҳаракатларимизни давом эттирамиз», — таъкидлади Элизабет Шервуд-Рэндалл.
«Шунингдек, биз афғон халқига муносиб тинчлик олиб келадиган ва Афғонистон келажагини қўллаб-қувватлаш учун янада кучли минтақавий ва халқаро базани яратадиган сиёсий ечимга эришиш учун музокараларни қўллаб-қувватлашни давом эттирамиз. Бу Афғонистон халқи ва жамоавий хавфсизлигимиз учун биргаликда қилишимиз керак бўлган ишдир», — деди у.
Бундан ташқари, АҚШ президенти маслаҳатчисининг сўзларига кўра, ҳозирда мамлакат вакциналарнинг дунё бўйлаб тарқалишини тезлаштириш учун агрессив кампанияни амалга оширмоқда. «Биз COVAX дастурига 500 млн дозани ваъда қилдик ва вакцина ушбу минтақага ҳам етиб келади», — дея қўшимча қилди у.
