Ироқ жанубидаги Ди-Қар провинцияси Эн-Насирия шаҳридаги касалхонада юз берган ёнғинда камида 50 киши ҳалок бўлди, дея хабар бермоқда Интерфакс Associated Press маълумотларига таяниб.

Қайд этилишича, COVID-19 беморлари даволанадиган бўлим ёниб кетган. Ўнлаб одамлар жароҳатланган.

BNO News хабарига кўра, ҳозирда вафот этганлар сони 58 нафарга етди.

Мавжуд версиялардан бирига асосан, қисқа туташув ёнғинга сабаб бўлган. Бошқа манбаларга кўра, кислород балонининг портлаши натижасида ёнғин юзага келган. Ироқ Соғлиқни сақлаш вазирлиги ёнғин сабабларини расман эълон қилмади.

Агентликка хабардор манбалар маълум қилишича, ёнғин содир бўлган филиал атиги уч ой олдин очилган. У 70 беморга мўлжалланган бўлган.

Соғлиқни сақлаш департаменти вакили Ди-Қара Аммар ал-Замилининг маҳаллий ОАВларга маълум қилишича, ёнғин бошланганда бўлимда камида 63 нафар бемор бўлган.

Таъкидланишича, бино ёнувчан материаллардан қурилган.

Апрель ойида Ироқнинг Боғдод шаҳридаги коронавирус инфекциясига чалинган беморлар учун жиҳозланган шифохонада юз берган ёнғинда 80 дан ортиқ киши ҳалок бўлиб, 110 киши жароҳатланган эди.

Ҳозирда Ироқда коронавирусга чалиниш ҳолатларининг навбатдаги тўлқини кузатилмоқда. Мамлакатда ҳар куни 9 мингдан ортиқ юқтириш ҳолатлари рўйхатга олинмоқда.