Қонунчиликка ўзгартириш киритиш орқали коррупционерларга жиноий жазони ўташда енгиллик берилмайди. Бу ҳақда Олий суд раиси ўринбосари Икром Муслимов АОКАда бўлиб ўтган брифингда маълум қилди.
Таъкидланишича, коррупционерлар жиноий жазони ўтаётган вақтда улар муддатидан олдин озодликка чиқарилмайди, тайинланган жазо енгилроғига алмаштирилмайди.
«Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида"ги президент фармонида Бош прокуратура, Олий суд, ДХХ, ИИВ ҳамда Адлия вазирли билан биргаликда уч ой муддатда қуйидагиларнинг назарда тутувчи қонун лойиҳасини ишлаб чиқиб, Олий Мажлис Қонунчилик палатасига киритиш топшириғи қўйилган:
- Жиноят кодексида коррупцияга оид жиноятлар тоифасига кирувчи моддаларнинг аниқ рўйхатини белгилаш;
- коррупцияга оид жиноятлар учун белгиланган жазо чораларини узоқ муддатли озодликдан маҳрум қилиш жазо чорасигача кескин кучайтириш;
- даромадлар ва мол-мулкни декларациялаш жараёнида аниқланган ноқонуний бойлик орттирганлик учун жавобгарлик ўрнатиш;
- коррупцияга оид жиноятларни содир этган шахсларга нисбатан жиноий жазони ўташда енгиллаштирувчи нормалар қўлланилишига чекловлар белгилаш.
Аввалроқ, охирги тўрт ярим йил ичида коррупцион жиноятлар сабабли 3,2 трлн сўм зарар етказилганлиги ҳақида хабар берилган эди.
