Олий Мажлис Қонунчилик палатаси депутати Расул Кушербаев карантин чораларининг кучайтирилиши, оммавий байрам тадбирлари тўхтатилгани, тўй ва маросимлар 50 кишидан ортиқ ҳолатда рухсат берилмаслиги ҳақида фикр билдирди.
Унинг таъкидлашича, карантин бўйича қўшимча чекловларнинг заиф томони шундаки, бу амалда катта натижа бермай, аксинча, аҳолининг ҳукумат ва ҳуқуқ-тартибот идоралари ходимларига нисбатан норозилигини ошириши мумкин.
«Чунки биринчидан, бунга амалда риоя этилишини тўлиқ назорат қилиш механизми йўқ. Сабаби амалда биз «зўр"лар тўй ва маърака ўтказишда одам сони чекланишига риоя қилмаганлигига кўп гувоҳ бўлдик. Чекловлар кўпинча «орқаси»да ҳеч кими йўқ, оддий фуқаролар учун ишлатилди», — дейди Расул Кушербаев.
Унинг қўшимча қилишича, бу жойларда карантин коидаларини чеклаб ўтиб ишлаш истагида бўлганлар ва назоратчилар ўртасида коррупцион ҳолатларни ошириши мумкин. Чунки солиқ, кредит ва бошқа мажбурий тўловлар чўзилса ҳам, бироқ тўлиқ бекор қилинмади.
«Учинчидан, карантин қоидалари бекор қилинмаган бир вақтда жойларда минглаб одамларни тўплаб ўтказилган концерт томошалари мисолида карантин қоидаларига риоя этишда иккиюзламачилик ишининг юксак чўққиси кўринди: сенга мумкинмас, бизга мумкин», — дея киноя қилди депутат.
Расул Кушербаевнинг фикрича, чеклов ҳақида гап кетганда, одам сонига қарамай ё тўлиқ чеклаш ёки тўлиқ рухсат бериш лозим, шу жумладан тўй ва оилавий тадбирларга ҳам. «Бўлмаса, бу чекловлар ҳам „кимдир тўй ўтказиб олиши учун“, деган фикр пайдо қилади», — дея қўшимча қилади у.
«Кейин касалликка қарши оммавий эмлашни ҳам ихтиёрийликдан мажбурийликка ўтказиш керак, вассалом. Шунда кутилган натижага тезроқ эришилади», — деб ёзади депутат ўзининг Телеграм-каналида.
Эслатиб ўтамиз, Ўзбекистонда оммавий тадбирлар, концерт, фестиваль, театр ва кино дастурлари вақтинча тўхтатилди.
Шунингдек, Республика махсус комиссияси қарори билан 1 августдан бошлаб тўй ва маросимларни 50 кишидан кўп бўлмаган ҳолда ташкил этишга рухсат берилди.
Аввалроқ, Коронавирусга қарши кураш штаби аъзоси Нурмат Отабеков аҳолини COVID-19га қарши мажбурий эмлаш ғоясини тўғри деб ҳисоблаши ҳақида хабар берилган эди.
