Коронавирусга қарши эмланган талабаларга контракт тўловида 10%лик чегирма берилади. Бу ҳақда ССВ ахборот хизмати хабар бермоқда.
Маълум қилинишича, Республика махсус комиссиясининг қарорлари билан коронавирусга қарши умумий эмлаш ишларига жалб этилган аҳоли гуруҳлари қатори кенгайтирилди.
Унга кўра:
- 18 ёшдан катта бўлган Самарканд ва Тошкент вилояти аҳолисини, шунингдек, имкониятдан келиб чиқиб, бошқа ҳудудлардаги 18 ёшдан катта аҳоли қатламини ўзлари бириктирилган бирламчи тиббий-санитария муассасаларида ихтиёрий равишда эмлаш белгиланди;
- Ўзбекистонда фаолият кўрсатаётган барча давлат ва нодавлат олий таълим муассасаларининг бакалавриатура, магистратура, клиник ординатура босқичларида таҳсил олаётган 18 ёшдан катта бўлган талабаларни давлат бюджети маблағлари ҳисобидан коронавирусга қарши ихтиёрий равишда оммавий эмлаш белгиланди.
Шунингдек, коронавирусга қарши ихтиёрий равишда эмланган тўлов контракт асосида ўқийдиган талабаларга ташкилий-ҳуқуқий шаклидан қатъи назар, 2021−2022 ўқув йили учун базавий тўлов контрактига 10 фоиз миқдорида бир марталик чегирма бонуси берилади.
Аввалроқ, 18 ёшдан катта бўлган Тошкент шаҳри аҳолисини ҳамда ОТМ профессор-ўқитувчиларини бепул коронавирус инфекциясига қарши оммавий эмлаш бошлангани ҳақида хабар берилган эди.
