Тошкент шаҳрида деярли 900 млн сўм кредит маблағларини ноқонуний равишда кўлга киритган шахс аниқланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.

Ўтказилган терговга қадар текширувда, фуқаро С.С. «R.L.» ва «O.N.» МЧЖларни норасмий равишда юритиб келгани маълум бўлган. Аниқланишича, С.С. ушбу жамият раҳбарлари ва бошқалар билан олдиндан тил бириктириб, 34 нафар фуқароларни гўёки мазкур жамият ишчилари сифатида расмийлаштирган.

Департамент қайд этишига кўра, С.С. мазкур фуқароларнинг хабардорлигисиз тижорат банк филиаллари орқали «Joyda» мобил иловаси ёрдамида 897 млн сўм онлайн-кредит маблағларини фирибгарлик йўли билан қўлга киритган ва олинган кредитнинг 769,7 млн сўмини қайтармасдан, ўз эҳтиёжлари учун сарфлаб юборганлиги аниқланган.

Ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатларни қалбакилаштириш) билан жиноят иши қўзғатилиб, тергов ҳаракатлари ўтказилмоқда.