UzReport TV Beeline`ни судда ютди, дея хабар бермоқда канал матбуот хизмати.
Маълум қилинишича, 28 июнь куни Тошкент туманлараро иқтисодий суди судьяси Виталий Ли раислигида «Uzreport» МЧЖнинг «Unitel» МЧЖга (Beeline савдо белгисига эгалик қилади) нисбатан даъвосини тўлиқ қаноатлантириш тўғрисида қарор қабул қилинган.
Суднинг қарорига кўра, жавобгар «Unitel» МЧЖга Beeline TV мобил иловасидан UzReport TV ҳамда Futbol TV телеканалларини олиб ташлаш, келгусида ушбу телеканалларни МЧЖ UzReport TV ахборот агентлиги билан шартнома тузмасдан намойиш этмаслик мажбурияти юкланди.
«Телеканалимизнинг Beeline`га қарши даъвосини тўлиқ қондириш тўғрисидаги суд қарорини, албатта, биз холис ва адолатли деб ҳисоблаймиз. Муаллифлик ҳуқуқини ҳимоя қилиш давлат сиёсатининг ажралмас қисми сифатида устувор йўналиш бўлиб, буни мамлакатимиз президентининг ушбу масалага қаратаётган эътиборлари ҳам тасдиқлайди», — дейди UzReport TV бош муҳаррирининг 1-ўринбосари Алишер Азимов.
Таъкидланишича, Uzreport судда аниқланган ҳолатларга асосланиб, ҳозирда «Unitel» МЧЖга, шунингдек, «Ўзбекистон Кабель Телевиденияси» МЧЖга нисбатан ушбу компанияларнинг ноқонуний хатти-ҳаракатлари натижасида етказилган моддий зарарни ундириш тўғрисида даъво аризаси тайёрламоқда.
Аввалроқ, UzReport TV ўз мобиль иловасида телеканалларнинг қайта трансляцияси туфайли Unitel (Beeline) компаниясини муаллифлик ҳуқуқини бузганликда айблаб, унга қарши судга мурожаат қилган эди. Beeline Uzbekistan ушбу айблов билан рози эмаслигини ва ўз позициясини қонунлар доирасида ҳимоя қилишга тайёрлигини билдирган.
Beeline муносабати
Маълум қилинишича, «Beeline Uzbekistan» Ўзбекистоннинг амалдаги қонунчилиги доирасида ишлайди ва Тошкент туманлараро иқтисодий судининг биринчи инстанция қарори билан қўллаб-қувватланган «UzReport TV» МЧЖ АА-нинг позицияси билан рози эмас.
«Телекоммуникациялар тўғрисида"ги қонуннинг 22-моддасига биноан, «Операторлар ва провайдерлар қуйидагиларга мажбурдир: телекоммуникация соҳасидаги фаолиятни лицензиядаги шартларга ва белгиланган қоидаларга мувофиқ амалга ошириш».
Қайд этилишича, лицензияланган шартномага мувофиқ, Ахборот технологиялари ва коммуникацияларини ривожлантириш вазирлиги «Unitel» МЧЖга телевизион тарқатиш тармоқлари (ретрансляция) хизматларини кўрсатиш бўйича фаолиятни амалга оширишда «Ўзбекистон кабель телевиденияси» МЧЖ билан тузилган шартнома асосида белгиланган телеканаллар тўплами билан «Ягона сигнал» олиш мажбуриятини юклади.
Beeline таъкидлашига кўра, «Ўзбекистон кабель Телевиденияси МЧЖ» — бу Ўзбекистон ҳудудида «Ягона сигнал»нинг тарқатувчиси — телевизион каналларнинг (дастурларнинг) белгиланган тўплами, оммавий ахборот воситаларининг телевидения маҳсулотларидан ташкил топган, Идоралараро мувофиқлаштирувчи комиссияси томонидан Ўзбекистоннинг ахборот фаолияти ва маълумотларни узатишни такомиллаштирилиш ва самарадорлигини ошириш учун тасдиқланган.
«Ушбу белгиланган телеканаллар тўплами Ўзбекистон ҳудудида икки юздан ортиқ операторлар ва провайдерлар томонидан стандарт Лицензия шартномаларига мувофиқ „Ўзбекистон кабель телевиденияси“ МЧЖ-дан қабул қилиб, уни қайта узатадилар (ретрансляция)», — дейилади хабарда.
Қўшимча қилинишича, «Beeline Uzbekistan» «UzReport TV» МЧЖ АА-нинг даъво аризаси номувофиқ жавобгарга эълон қилинган деб ҳисоблайди. «Unitel» МЧЖ кейинги ҳаракатлар учун «Телекоммуникациялар тўғрисида"ги қонунининг бажарилишини назорат қилувчи давлат идоралари билан барча керакли консультацияларни ўтказади.
