Қашқадарё вилоятида карантин бўйича тартиб ва чекловларга қўшимчалар киритилди, дея хабар бермоқда вилоят ҳокимлиги ахборот хизмати раҳбари Аҳрор Содиқов.
Маълум қилинишича, 28 июнидан вилоят ҳудудида кўнгилочар объектлар — ресторан, тунги клублар, дискотека, караоке, билярд заллари ва компьютер ўйинлари марказлари ҳамда умумий овқатланиш объектлари — кафе, ошхона, чойхоналарни ишлашига соат 8:00 дан 22:00 гача рухсат берилади.
Янги киритилган қўшимчаларга кўра:
- кўнгилочар ва умумий овқатланиш объектларида ташриф буюрувчиларга ушбу муассасаларнинг умумий сиғимининг 50 фоизидан қатъий оширмаган ҳолда хизмат кўрсатиш;
- супермаркет ва бошқа йирик дўконларнинг кириш-чиқиш жойларини пирометрлар, дезинфекцион «тўшаклар» ва антисептик воситалари билан жиҳозлаш, уларга киришда ҳар бир фуқаронинг тана ҳароратини ўлчаб, 37С ва ундан юқори бўлган ёхуд инфекция аломатлари мавжуд бўлган ҳолатда киритмаслик, ижтимоий масофани сақлаш, тиббий ниқобда бўлишини таъминлаш;
- барча бозорлар — деҳқон ва буюм бозорлари, пиширилган таомлар билан савдо қилувчи бозорлар, кунлик бозорлар, қурилиш моллари билан савдо қилувчи бозорлар, автомобил ва улгуржи бозорлар ҳафтанинг бир кунини санитар-тозалаш учун ёпишни шахсан назоратга олиш;
- кунлик ва жума намозларини фақат масжиднинг очиқ ҳаводаги майдонларида (очиқ айвонлар, масжид ҳовлиси, масжидга туташ ички кўчалар) тиббий ниқобда бўлиш ва оралиқ масофани сақлаган ҳолда ташкил этилади.
Шунингдек, коронавирус инфекцияси билан касалланган беморлар ва ушбу инфекциясини юқтирганликда гумон қилинган шахсларга Қарши шаҳридаги «Шўртан газ кимё мажмуаси» МЧЖ балансидаги «Геолог» спорт мажмуасида ташкил этилган COVID-19 тақсимлаш маркази фаолияти қайта тикланади.
Аввалроқ, 28 июндан бошлаб барча умумий овқатланиш объектлари ва кўнгилочар объектларнинг иш вақти соат 8:00дан 20:00гача қилиб белгиланиши ҳақида хабар берилган эди. Кейинроқ Қашқадарё вилояти ҳокими Зойир Мирзаев кўнгилочар объектларнинг иш вақтини 22:00гача узайтиришни таклиф қилган эди.
