14 июнь куни президент матбуот хизмати томонидан «Менинг ҳикоям» лойиҳаси намойиш этилди. Маълум қилинишича, ушбу лойиҳада «Ёшлар дафтари»га киритилган йигит-қизлар ушбу ташаббуснинг улар ҳаётида нималарни ўзгартиргани, қандай кўмак бергани ҳақида сўзлайдилар. Лойиҳанинг биринчи меҳмони Азиза Самиғова бўлди.
Фото: Президент матбуот хизмати
«Карантин пайтида маска тикдик. Биринчи ишимизни маска тикишдан бошлаганмиз», — дейди Азиза.
Унинг таъкидлашича, «Ёшлар дафтари» ташкил қилинганидан кейин банк томонидан тикув машиналари сотиб олишга кредит ажратилган.
«Бир нарсалар деб талаб ҳам қўйишди. Залог, у-бу деб, кейин биз «Ёшлар дафтари»га киритилганимизни, у ерда бундай нарсалар йўқлигини айтдик. Биз ўз ҳуқуқимизни билганимиз учун бизга қийинчилик туғдирмади», — дея қўшимча қилади у.
Азизанинг айтишича, улар 66 млнлик тикув машиналари харид қилган. «Микрофон кўтарган аёл» телеграм-каналининг ёзишича, Азиза тадбиркорлик бошлайман деб 3 та замонавий тикув машинасини сотиб олиш учун 36 млн сўм кредит олган.
«Ҳозир қурилаётган намунали уйлардан беришларини хоҳлайман. Чунки бу ерда ҳозир ҳам ишлаб, ҳам яшаяпмиз. Кейин бу ерда ишхона учун шароит қиламиз», — деган эди Азиза.
28 июнь куни президент Шавкат Мирзиёев Азиза Самиғовага мактуб йўллади. «Микрофон кўтарган аёл» каналининг маълум қилишича, президент матбуот хизмати томонидан тайёрланган видеоролик давлат раҳбари эътиборига тушган. Президентнинг Азизага йўллаган мактубида қуйидаги жумлалар келтирилган: «…Тақдирнинг ҳар бир синовида албатта ҳикмат бор. Ҳаёт қийинчиликлари инсонни янада кучли қилади. Шубҳасиз бу синовли кунлар ҳам ўтмишга айланади. Шуни билингки, сиз ҳеч қачон ёлғиз эмассиз. Сизнинг тимсолингизда барча шижоатли ўғил-қизларимизнинг мақсадлари амалга ошиши учун доимо ёрдам қўлини чўзамиз».
«Беғубор ёшлик даврингизда ҳаётнинг турли синовларини бардош билан енгиб ўтаётганингиз мени ҳам давлат раҳбари, ҳам ота сифатида ниҳоятда тўлқинлантирди», — дейилади президент мактубида.
Фото: Президент матбуот хизмати
«Микрофон кўтарган аёл» телеграм-каналининг маълум қилишича, давлат раҳбари мактубида Азиза ва унинг онасига 3 хонали уй берилишини маълум қилган. «Ўзбекистон 24» телеканалига кўра, Янгиҳаёт тумани, Янги чоштепа маҳалласи, Ўзар кўча, 53-уй, 14-хонадон Азиза ва унинг онасига берилган. 28 июнь куни президент матбуот котиби Шерзод Асадов иштирокида мазкур хонадон уларга топширилган.
Фото: «Ўзбекистон 24» телеканали
««Ёшлар дафтари»дан кейин ҳаётим тубдан ўзгарди. Тадбиркорлигимизни ойижоним иккаламиз бошлаб олдик. Келажакдаги режаларим шахсий хонадонга эга бўлиш эди. Ярим йил ичида шу ниятимга эришдим. Президентимиз хонадон совға қилганлари учун чуқур миннатдорчилигимни билдираман. Мен ватанимга кераклигимни ҳис қилдим. Мен ёлғизмаслигимни ҳис қилдим. Энди кейинги режаларим 1+1 дастури асосида ўзимга ўхшаган ёшларни тадбиркорликка йўналтириб, иш билан таъминлаб, уларни тикишга ўргатаман. Ҳаммага раҳмат. Президентимизни яхши кўраман», — деди Азиза хонадон топширилиш маросимида.
Фото: «Ўзбекистон 24» телеканали
«Ҳамма аёлга шунақа ошхоналар насиб қилсин. Меҳмон кутишга тайёргарлик кўряпмиз. Ҳар бир она учун бунақа чиройли ошхоналар орзу, деб биламан. Шундай имкониятларни яратиб, бизни етолмаган орзуларимизга етиштирган президентимизга раҳмат. Она сифатида менинг бошимдан ўтказаётган туйғуларимни тасаввур қилсангиз, мен буни сўз билан таърифлаб бера олмайман. Ҳозир мен ўзимни жуда ҳам бахтли аёллардан, деб ҳисоблайман. Энди буёғига янги уйларда совчи кутамиз», — дейди «Ўзбекистон 24» телеканалига Азизанинг онаси Адолат Раҳимова.
