Август ойида COVAX дастури доирасида ЖССТ томонидан тан олинган вакциналардан бири Ўзбекистонга етказиб берилиши кутилмоқда.
Бу ҳақда Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов маълум қилди.
«Август ойида Ўзбекистонга COVAX дастури доирасида AstraZeneca (CovieShield эмас), Pfizer, Moderna ёки ЖССТ тасдиқлаган бошқа вакцина келиши кутилмоқда», — деди у.
Ўзбекистон COVAX’га август ойида қўшилган. Дастурнинг мақсади лицензияланган вакцинани унинг барча иштирокчилари ўртасида тенг равишда тақсимлашдир. Мамлакатга 2 млндан ортиқ дозада AstraZeneca вакцинасини етказиб бериш режалаштирилган. Март ойининг ўрталарида 660 минг дозадан иборат биринчи партия қабул қилинган.
Аввалроқ, Ўзбекистонга Россиянинг «Спутник V» 240 минг дозаси ва ZF-UZ-VAC2001 хитой-ўзбек вакцинасининг 4,5 млн дозаси келтирилган эди.
Январь ойида Соғлиқни сақлаш вазирининг ўринбосари — Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев Ўзбекистонга Pfizer ва BionTech компаниялари томонидан ишлаб чиқарилган 100 минг дона вакцина олиб келиниши ҳақида маълум қилган эди.
